انجي ابراهيم
إيه الفرق بين علاقتك بصاحبتك وعلاقتك بجوزك؟ فرق شاسع طبعًا٬ تقدري تقولي لصاحبتك أي حاجة بس متقدريش مع جوزك٬ صاحبتك هتفهمك مهما حكيتيلها حاجات غريبة وغير منطقية، إنما جوزك لأ٬ الهزار مع صاحبتك أحيانًا بيكون فيه حرية أكتر من هزارك مع جوزك٬ وطبعًا الكلام في الجنس بيبقى أكتر وأريح ومفصل أكتر في قعدات الستات مع بعضهم.
طيب المدى ده من الحرية والارتياح في علاقتك بصاحباتك٬ عندك نسبة قد إيه منه في علاقتك بجوزك؟
ده سؤال مهم جدًا ومؤثر جدًا في علاقتكم الزوجية.
في السنين الأخيرة اكتشفت إن فيه علاقات زوجية كتير مفيهاش أي قدر من الصحوبية٬ حتى مع وجود التفاهم والعشرة واللي نقدر نسميه حب٬ إلا إن الراحة والأريحية مش موجودين٬ يعني مثلاً اكتشفت إن فيه ستات كتير مش بيوافقوا إن الزوج هو اللي يساعدهم في الاهتمام بنضافتهم الشخصية قبل الولادة أو بعدها٬ أو قبل وبعد العمليات الجراحية الكبيرة٬ بيشوفوا إن ده ميصحش.
كمان الكلام عن العلاقة الحميمة يعتبر خيار غير مطروح أصلاً في كتير من علاقات الجواز٬ طبعًا مش هنتكلم عن الفانتازيا والتخيلات الجنسية، والكلام عن تطوير العلاقة الحميمة وتجربة أشياء جديدة وغير معتادة، عشان دي تابوهات مينفعش نقرب منها.
على الجانب الآخر الستات بيتكلموا مع صاحباتهم في كل ده٬ تخيلي بقى لو كان فيه الحرية دي في الكلام أو نسبة منها في الجواز٬ مش كان يبقى الأمر لطيف وممتع؟
لما الزوجين بيبقى فيه بينهم علاقة صحوبية ده بيسهل عليهم حاجات كتير٬ أولهم وأهمهم العلاقة الجنسية٬ واللي في تسعة وتسعين في المية من الحالات مسؤولة عن سعادة الحياة الزوجية، لو الزوجين أصحاب علاقتهم بيكون فيها حرية أكبر٬ علاقتهم الحميمة هتكون متحررة أكتر٬ هيكون فيه بينهم حميمية وثقة تخليهم سكن حقيقي لبعض٬ بيكونوا قادرين يتبادلوا الأفكار والكلام والاقتراحات أكتر من زوجين علاقتهم باردة مفيهاش اندفاع وحميمية الصحوبية.
الزوجين لو مش أصحاب مش هيكون فيه بينهم لغة حوار في أي جانب من جوانب حياتهم٬ مش هيكونوا قادرين يوصلوا لبعض٬ لازم على الأقل حد أدنى من الصداقة اللي يأمنلهم قدر من التفاهم والقرب يمَشوا بيه حياتهم٬ وللغرابة ده مش موجود في معظم البيوت للأسف٬ واللي مش قادرين يحلوا مشاكل حياتهم اليومية أكيد علاقتهم الخاصة مبتكونش مشبعة ولا مرضية للطرفين٬ حتى لو فيها إشباع جسدي.
العلاقة الجنسية بين الزوجين اللي بينهم صداقة قوية بتكون أظرف وأخف وألطف٬ ومبتكونش دقايق وبتخلص، بالعكس علاقتهم بتسمحلهم بالمناقشات والكلام الممتد عن الموضوع، وده بيوفرلهم متعة مختلفة عن متعة الدقايق اللي مهما طالت فهي بتفضل دقايق.
طب هل الوقت فات واللي ذاكر ذاكر واللي معرفوش يصاحبوا بعض فرصتهم خلصت؟
لا طبعًا٬ أبدًا، الوقت مفاتش على أي حاجة٬ وأفضل الطرق هي أقصرها٬ لو اقتنعتي بالكلام وشايفة إن علاقتكم الزوجية تنفع تكون بالحميمية دي٬ وإنكم على قدر معقول من التفاهم والحب٬ اتشجعي واتكلمي مع جوزك بهدوء في الموضوع ده٬ واطلبي بوضوح إنه يكون صاحبك وجربوا. لو قدرتوا تنقلوا العلاقة للمستوى ده٬ صدقيني المتعة هتختلف تمامًا٬ وبالتالي حياتكم كلها -غالبًا- هتتغير.
عارفة إنك متعودتيش تتكلمي بالحرية دي، وعارفة إن الطلعة الأولى هتكون صعبة، بس صدقيني نسبة كبيرة من الرجالة بيتلككوا عشان علاقاتهم بزوجاتهم تكون مشبعة، وبينبسطوا قوي لو خدوا حريتهم، خاصة في العلاقة الجنسية، فغالبًا جوزك هيفرح بمبادرتك وهيساعدك تطوروها وتنقلوا علاقتكم لمستوى جديد.
مش شرط تحاولي تخلي جوزك هو صاحبتك الأنتيم، بس على الأقل جربي تعتبريه صاحبك حتى لو مش صديق مقرب، هيفرق جدًا معاكي، وطبعًا إنتي أكتر واحدة أدرى بطبيعة علاقتك بجوزك وإنتي اللي تقدري تحددي مدى القرب المتوقع، ومش لوحدك أكيد، الجواز علاقة بين اتنين وجوزك هو الطرف التاني في العلاقة، وعليه مسؤولية زيك بالظبط.
الزوج اللي قادر يخلق مساحة آمنة مع مراته هيحس بالأمان أكتر، أصل مين ممكن يكون أقربله من الشخص اللي بيشاركه كل تفاصيل حياته ويومه وحتى جسمه؟ مين ممكن يفهمه أكتر من شخص عارفه وحافظه من جوة ومن برة؟ الزوج والزوجة هما أقرب اتنين لبعض، حتى لو مفيش بينهم علاقة صداقة، إلا إن في الحقيقة هما الاتنين بينهم وبين بعض أقدس وأقرب علاقة موجودة بين البشر، فلو العلاقة دي بقى فيها نسبة حرية وصداقة الأمور هتختلف جدًا، نفسيًا وجنسيًا كمان، الجنس اللي فيه حرية وثقة وتقبل أمتع من الجنس المحسوب بالورقة والقلم.
الكلام ده مش خيالي قوي، وقابل للتنفيذ، جربوا، التجربة عمرها ما خسرت أي حد أي حاجة، ومن قلبي بتمنالكم حياة سعيدة، وصداقة متينة، وعلاقة خاصة ممتعة بناءً على كل ما سبق.
