محدش محتاج أجازة وتغيير جو من وقت للتاني أد الأمهات المطحونات، المشكلة بتظهر لمَّا الأمهات تسافر أجازات فعلاً وتتفاجئ إنها معرفتش تنبسط، وإن كل التغيير اللي حصل هو انتقال مكان ممارستها للأمومة بكل حذافيرها من المكان (س) للمكان (ص) وكأنك يا أبو زيد ما غزيت!
وده بيتسبب في إن الأمهات ترجع من الأجازة مكتئبة أكتر من الأول لأنها بتكون حاسة بالإحباط وإنها اتحولِّت من بنت سلطح باشا للرفيقة الدادة أم عطيات وهي لسه في عز شبابها، وتبدأ أسطوانة يا صغيرة ع الهَم يا لوزة، اللي بيُقابلها الزوج بسيمفونية الزوجات أنكَد الكائنات.
ولأني أم زي باقي الأمهات، وبعد عدة سفريات غنيت فيها ظلموه، حاولت أوصل لمجموعة من قواعد السفر بالعفاريت الصغيرة لعل الله يُحدث بعد ذلك أمرًا، وبدل ما كُنا بنرجع من الأجازة عايزين أجازة، نرجع شاحنين نفسنا ولو 50%.
عزيزتي الأم إليكي13 قاعدة للسفر بالعيال
1- قُدامك سِكة سَفَر
لو بتسافري بشكل سنوي أو نصف سنوي حاولي كل مرة تختاروا مكان جديد عشان متحسوش بالملل وإنكم بتكرروا نفسكم، والأهم حاولوا تُحطوا في بالكم وأنتم بتختاروا إن المكان يكون فيه حياة مش مقطوع، بحيث لو حصل أي مشكلة تقدري تتصرفي من غير ما تقطعي أجازتك وترجعي عشان تودي عيل لدكتور أو تلاقي البامبرز اللي ابنك متعود عليه.
2- ادّي ضهرك للترعة
قبل ميعاد السفر بفترة حاولي متعرّضيش طفلك لأي حاجة تخليه يتعب أو يُلقط عدوى من هنا ولا من هناك عشان متضطريش تلغي السفرية، أو في أحسن الأحوال تسافري بيه وهو عيان وتقضيها أدوية وكمادات، وبدل ما تنبسطوا يومين تلاقي نفسك شغالة ممرضة، لا أنتي غيّرتي جو ولا طفلك انبسط واكتشف المكان الجديد.
3- فن تحضير الشنطة
عشان الإنسان أعمى ولو كان بصير، وعشان غالبًا هتكوني إنتي المسؤولة عن عملية تحضير شُنط كل اللي في البيت ومش عايزة تنسي حاجة، اعملي ليستة مكتوبة بكل اللي عايزة تاخدوه معاكم.
قسّمي الليستة الرئيسية لقوائم فرعية باسم كل شخص من المسافرين، ويقول خُبراء تحضير الشنط إن أفضل وسيلة عشان متنسيش حاجة إنك تمسكي كل شخص -في دماغك- من فوق لتحت بالترتيب وتسجلي هيحتاج إيه في القائمة الخاصة بيه. مع مُحاولة تكوين صورة تقريبية لعدد القِطَع المطلوب. بلاش تاخدي الدولاب كله -زي حالاتي- وترجعي من غير ما نُص الشنطة تتلمس، إنتي مش مهاجرة، وحتى لو مهاجرة متفضحيناش.
خلصتي القوائم الشخصية؟
اعملي قايمة بالكماليات اللي هتحتاجوها، يعني صن بلوك، كريم شعر، مشط، فرشاة أسنان، صابونة، فوطة… إلخ… إلخ. ممكن كمان تعملي قائمة بالأنشطة الترفيهية، زي كوتشينة، كتاب، لعبة للننوس وهكذا. وأخيرًا اعملي قائمة للحاجات اللي هتاخديها معاكي في شنطة إيدك أثناء السفر بحيث يكون فيها كل اللي ممكن تحتاجيه في الطريق من غير ما تضطري تفتحي الشُنط الأساسية.
4- الاحتياط واجب
خُدي معاكي الأدوية الرئيسية اللي ممكن يحتاجها طفلك لو تعب -لا قدر الله- مش لازم تاخدي كل حاجة لو ضامنة إنك مسافرة مكان هتتوفر فيه الصيدليات بسهولة، بس على الأقل خُدي معاكي خافض حرارة لأن أي حاجة ممكن تحتمل الانتظار إلا السخونية.
5- متنسيش نفسك
إنتي مش رايحة تخَدِّمي على عيلتك بس في بلد تانية، إنتي رايحة تتفسحي زيك زيهم، فيا ريت لو تاخدي معاكي كتاب أو أي وسيلة لتسليتك الشخصية في الأوقات اللي هتقدري تختلي فيها بنفسك.
6- الجيش بيقولك اتصرَّف
حاولي تختاري ميعاد السفر وقت نوم الطفل عشان ميغلّبكيش في الطريق، ولو الأوبشن ده مش متوفر يبقى حاولي قبل السفر تخلي ابنك صاحي أطول فترة متصلة ممكنة عشان أول ما تبدأوا الرحلة ينام على طول.
7- المرأة نصف المجتمع
قالك نُص، لا تِلتين ولا تلات تربع، ومن هذا المُنطلق متشيليش كل حاجة على دماغك لوحدِك، خصوصًا خصوصًا في الأجازة، قَسّمي المهام بينك وبين جوزك، وخلوا ابنكم مسؤولية مشتركة، يعني لو إنتي هتأكليه يبقى هو اللي يجري وراه لما تخرجوا.
وعمومًا ارمي أي مسؤولية تقدري تتخلصي منها من على كتفك، يعني لو النزول في فندق مُتاح ده هيشيل من عليكي أكل وترويق وخلافه، لو مكانش يناسبك يبقى متطبخيش في الأجازة وكُلوا من برة، متغسليش، إنتي مش واخدة الدولاب كله معاكي ع الفاضي! حاولي كمان متاخديش حاجة تكون محتاجة مكواة… إلخ.
8- افصلي.. دي التلاجة بتفصل
أنا من أنصار إن الأجازة العائلية تكون للعائلة فقط، أخدنا إيه من الموبايلات واللاب توبات والفيسبوك؟ هتروحي وترجعي تلاقي كل الأخبار الكئيبة والخناقات والنمايم زي ما هي، لا قلم زاد ولا قلم نقص. إنما تبقي في الأجازة وحتة منك فى الجروب الفلاني والتانية في الانبوكس العلاني، وبتفكري مين عملك لايك ومين عملك شير ولا هتحسي إنك فصلتي.
9- ريلااااكس..سيب نفسك خالص
أرجوكي خُدي قرار بالروقان والانسجام والاستجمام ومتحبكيهاش، هيجرى إيه لو الواد قعد يومين من غير أكل ولا لقيتيه بيعطس شوية ولا ولا؟! ما ده العادي! ثم هو يعني أنتي تغاضيتي عن كل مُحاولاتك الفاشلة طول السنة وجاية تنجحيها يومين الأجازة؟!
10- وبتجمعنا الأماكن
حاولوا تختاروا أماكن متنوعة للفُسح يكون منها الترفيهي اللي بيتناسب مع وجود طفل، ومنها اللي بيتناسب مع وجود أسرة متكاملة، ومنها اللي يناسبك إنتي وجوزك كـ”كابل” عشان متحسيش إنك مبقيتيش غير أم العيال.
ومفيش مانع لو كُنتي مسافرة مكان فيه أي حد من أهلك أو معاكي صُحبة ما ممكن تستأمنيها على ضناكي إنك تسيبيلهم المحروس الصغير كام ساعة تُخرجي فيها إنتي والبيه جوزك لوحدكم تشموا نَفَسكم.
11- صورة، صورة، صورة.. كلنا كده عايزين صورة
عشان أكون صريحة معاكي، الأجازة طالت أو قصرت هتنتهي، والاكتئاب راح أو مراحش هيرجع، وده مش عشان إنتي نكدية، أبسلوتلي! إنما عشان هي دي الحقيقة الــمُطلقة بدون تزييف. فاللي هيتبقالكم من أي رحلة هو الصور اللي كُل ما تشوفيها هتفتكري الأيام الحلوة وتتشحنيلك بشوية طاقة وبهجة. عشان كده حاولوا توثقوا مُعظم اللحظات، صوروا بعض واتصوروا مع بعض كتير كتير كتير، مفيش أحلى من الصور.
12- عين الحسود فيها عود يا حلاوة
الأجازات بتِتنظِر.. ده مش رأيي الشخصي لكنه رأي ناس كتير أعرفها شايفين إن أي أجازة بيتقال عليها مُقدمًا بتبوظ أو بيحصل فيها مشاكل، عشان كده بيفَضَّلوا إنهم يقولوا عليها بعد ما تخلص. عن نفسي مبعملش كده وبقول من قبل الهنا بسنة، لكن ده ميمنعش إن ساعات كتير فعلاً الأجازات بتقلب نكد فأتساءل وقتها يا ترى فعلاً الأجازات ممكن تكون بتتنظر!
13- عَم عَشم مات
وأخيرًا.. بعد ماعملتي اللي عليكي وأخدتي كل الاحتياطات متتعشميش أوي وإياكي ترفعي سقف توقعاتك، حيث تقول الأسطورة إن اللي بيعملوا كده بينزلوا على جدور رقبتهم، احلمي واتمني زاااااااااااااااي ما إنتي عايزة.. بس بالعقل.
