هدلعني في 30 خطوة

1457

لو إنتي أم لطفل جديد واكل كل وقتك وتفكيرك، أو أم لأكتر من طفل بتجري وراهم طول اليوم، أو بتشتغلي وطول اليوم بين غلاسة الشغل وغلاسة المواصلات وفرهدة الحر ويا دوب بتروحي البيت تاكلي وتنامي، أو طالبة ومطحونة طول اليوم بين المحاضرات والملازم والعملي والشفوي، أو محظوظة بقى وبتلعبي كل الأدوار دي في بروجرام واحد ويا دوب بتلاقي وقت تتنفسي.

فكرنا نعمل تحدي يومي لمدة شهر، 30 حاجة بسيطة مش هياخدوا وقت كبير، لكن هيدوكي فرصة إنك كل يوم تعملي حاجة لنفسك ومتنسيهاش في الزحمة. فيه حاجات هنحاول نكررها بشكل يومي عشان تبقى عادة، وفيه حاجات ممكن نعملها مرة كل فترة.

 

1- تنظيم النوم:

مش بس النوم بدري والصحيان بدري، لكن وجود روتين للنوم هيفرق معاكي. غيَّري هدومك والبسي هدوم مريحة ونضيفة غير الهدوم اللي قضيتي بيها يومك، ولما تصحي غيري هدوم النوم والبسي لبس تاني للبيت حتى لو مش هتخرجي. اغسلي وشك وسنانك وادخلي السرير. ممكن تقري كتاب خفيف أو تسمعي حاجة هادية. مهم جدًا إنك متستعمليش اللاب توب أو الموبايل قبل النوم. (هنعمل كده كل يوم).

 

2- اغسلي وشك كويس:

بلاش الصابون العادي، استخدمي غسول وتونر أو ممكن صابون من مكونات طبيعية (زي صابون زيت الزيتون مثلاً، وبدل التونر استخدمي ماء الورد). اعملي ده يوميًا مرتين الصبح وبالليل.

 

3- تواصلي مع حد من أصدقائك أو قرايبك متواصلتيش معاه بقالك كتير:

ويا ريت تكون مكالمة هادية من غير عتاب، افتكروا مواقف لطيفة ومبهجة.

 

4- خدي وقتك لنفسك ولو حتى ساعة تعملي أي نشاط فني:

تكتبي أو ترسمي أو تلوني (دوري على الإنترنت هتلاقي صفحات كتير للتلوين للكبار، اطبعي منها، أو ممكن تلاقي كتب تلوين للكبار في أغلب المكتبات الكبيرة أو في مكتبات الفجالة). لو بتحبي التريكو أو الكروشيه اختاري خيوط ألوانها مبهجة واختاري حاجة سريعة متاخدش وقت، وابدأي اعمليها، بشرط تكون ليكي إنتي (يعني مش لكلوك لابنك ولا كوفية لجوزك).

 

5- خدي حمام طويل: 

غير الحمام اليومي السريع، لو فيه بانيو امليه مية وفقاقيع صابون ريحتها لطيفة أو زيوت عطرية واقعدي فيه نص ساعة. استخدمي الصابون المغربي واعملي صنفرة لجسمك، وحمام كريم لشعرك، وبعد الحمام ادهني جسمك بكريم ريحته حلوة أو زيت مرطب.

 

6- شيلي الشعر الزايد من وشك وجسمك: 

بأي طريقة تريَّحك سواء سويت أو شمع أو حلاقة.

 

7- اعملي لنفسك فطار مميز:

دوَّري على وصفة أومليت أو بان كيك مختلفة، أو إضافة جديدة لطبق الجبنة بالطماطم أو لطبق الفول. اعملي لنفسك كوباية عصير فريش. قطعي حبة خضراوات بشكل حلو ومميز، خيار وطماطم وجزر.

قدميه لنفسك بشكل حلو في طبق من الصيني اللي مستخبي في النيش، بلاش تفطري وإنتي متسربعة. اقعدي وخدي فطارك ومشروبك على مهلك. ولو عندك بلكونة أو شباك بيطل على منظر حلو يا ريت تفطري فيها.

 

8- ارقصي: 

شغَّلي موسيقى بتحبيها وارقصي عليها، حتى لو مبتعرفيش ترقصي، سيبي الموسيقى تحرك جسمك وروحك من غير تفكير.

 

9- اعملي حاجة بتخافي تعمليها:

مش لازم حاجة كبيرة، حتى لو حاجة بسيطة، زي إنك تعملي مكالمة تليفون مأجلاها.

 

10- اتمشِّي لوحدك في مكان حلو بالنهار: 

اختاري وقت الصبحية أو العصر، وقت الشمس متكونش حامية فيه، البسي لبس مريح بتحبيه واخرجي اتمشي، ممكن في شارع هادي أو على النيل أو البحر لو موجود في مدينتك. جيبي آيس كريم أو ذرة مشوي وكُليه لوحدك. لو بتضايقي من الدوشة حطي سماعاتك في ودنك.

 

11- شوفي فيلم حلو: 

سواء في السينما أو في البيت، اختاري فيلم لطيف وخفيف مش كئيب.

 

12- اعملي حاجة او اتنين من قايمة المهام المؤجلة: 

كل واحدة فينا عندها قايمة مهام مؤجلة قد الدنيا، اختاري حاجة أو اتنين واعمليهم، مش لازم تكون حاجات كبيرة، المهم تكون حاجة عارفة إنها هتسعدك.

 

13- اشتري حاجة لنفسك مبتشتريهاش في العادي: 

برضو مش لازم حاجة غالية، المهم إنها تبقى حاجة مش معتادة، لون روج فاقع أو حتى مانيكير، أكسسوار مميز ومختلف عن اختياراتك العادية. مش مهم الحاجة تبقى غالية المهم تنبسطي بيها.

 

14- اكتبي 3 حاجات بتحبيها في نفسك: 

سواء صفات شكلية أو أخلاقية.

 

15- اشربي 8 كوبايات مية: 

لو بتنسي خلي معاكي قزازة واعملي منبهات على الموبايل (يوميًا).

 

16- وقت المانيكير: 

انقعي رجليكي في مية دافية وخل لمدة تلت ساعة، استخدمي المبرد أو الحجر في إزالة الجلد الميت، ظبَّطي ضوافرك وحطي مانيكير حلو. وكرري العملية دي مع إيديكي.

 

17- نرتب الميل والموبايل وحسابك على فيسبوك: 

ادخلي على إيميلك ممكن تلاقي إيميلات مش مهمة محتاجة تتمسح وإيميلات محتاجة تردي عليها، رتبي الإيميل واتخلصي من اللي ملوش لازمة، وكذلك الموبايل، هتلاقي نفسك بتحفظي صور كتير لحاجات فقدتي اهتمامك بيها، أو تطبيقات مش مستخدمة امسحيها. واعملي أنفريند أو على الأقل أنفولو لأي حد بيعكر مزاجك على السوشيال ميديا.

 

18- النهارده مفيش فيسبوك/ يوتيوب/ إنستجرام: 

وسائل التواصل الاجتماعي مفيدة جدًا في حياتنا، بس منقدرش ننكر إنها أحيانًا بتاخد أكتر من اللازم من وقتنا. اقفلي وسايل التواصل الاجتماعي النهاردة خالص. (لو بتشتغلي من خلالها اعملي ده يوم أجازتك).

 

19- يوم الأكل الصحي: 

النهارده يوم الأكل الصحي، اختاري أكل صحي ومفيد، ومتشربيش مشروبات غازية، بدليها بعصير طبيعي.

 

20- هاتي زرع: 

دي حاجة مش مُكلِّفة، فيه نباتات بتبدأ من 5 جنيه. روحي أقرب مشتل اختاري زرعة مش محتاجة عناية كتير وشكلها حلو.

 

21- رتبي دولابك ودرج الماكياج والأكسسوارات: 

اتخلَّصي من الحاجات اللي مش بتلبسيها والماكياج اللي صلاحيته انتهت من سنين.

 

22- شوفي فيديوهات تعليمية لحاجة نفسك تتعلميها على يوتيوب.

 

23- اكتبي كل الحاجات اللي مضايقاكي في حياتك:

 فكري إيه اللي ممكن يتغير وحطي خطة لتغييره، واللي مش ممكن يتغير نحاول نتصالح معاه.

 

24- ربع ساعة رياضة: 

لو مبتلعبيش رياضة عادة اختاري تمرينات سهلة للمبتدئين، أو ممكن تكتفي بالمشي.

 

25- حركي جسمك: 

لو شغلك على مكتب أو على كمبيوتر وبتضطري تقعدي لفترات طويلة، اعملي منبهات على الموبايل عشان تفتكري تقومي وتحركي جسمك خلال اليوم.

 

26- اكتبي 3 حاجات حلوة حصلتلك النهارده.

 

27- رتبي شنط إيدك: 

عادة بنلاقي حاجات غريبة لما ننضف الشنط، رتبي شنطك وارمي الحاجات اللي مش محتاجاها (ويا ريت تعملي ده بشكل دوري).

 

28- اعملي ماسك لوشك: 

مش لازم حاجة مُكلفة، ممكن وصفة طبيعية من مكونات موجودة عندك في البيت. اختاري وصفة من الوصفات اللي مالية الإنترنت وجربيها.

 

29- وقت الاسترخاء: 

اختاري موسيقى هادية، والبسي هدوم مريحة، اقعدي في أوضة إضاءتها هادية وحاولي تفضي عقلك خالص من كل الأفكار والمشاكل اللي فيه، ركزي بس على إن جسمك وروحك وعقلك يسترخوا تمامًا.

 

30- في ورقة فاضية اعملي قايمة بالحاجات اللي بتنبسطي لما تعمليها، عشان تقدري ترجعيلها لما تحتاجي.

 

إنتي كده كملتي شهر كامل كنتي مركزة خلاله إنك تاخدي وقت لنفسك كل يوم.. يا ترى ممكن يفرق معاكي؟

المقالة السابقةوعادت روحي تتنفس مع “نون” فكيف تحجبونها؟!
المقالة القادمةإلى أبي

ترك الرد

الرجاء إدخال تعليقك!
الرجاء إدخال اسمك هنا