هدايا متفكريش تشتريها لراجل

2851

الرجالة مش زي الكائنات اللطيفة اللي هي إحنا البنات، عادة تفكيرهم عملي جدًا، مش عاطفيين للدرجة اللي تخليكي تتخيلي إنه هيفرح
والدمعة تفطّ من عينه لما تجيبيله دبدوب cute في سبت خوص ولفة مليانة ترتر ومعاها بوكيه ورد تحفة.
طيب نجيب إيه؟ خصوصًا أول هدية دي بتبقي حيرة ملهاش حل.
بما إن الرجالة تفكيرهم عملي جدًا هيحبوا الهدايا اللي بتفيدهم مباشرة وليها لازمة واستخدام في حياتهم، مش مجرد ديكور.. ومتجيبيش
ورد عمومًا، انسي أوبشن الورد نهائي عشان متتصدميش من رد الفعل.

دي قائمة مثلًا بالهدايا اللي ممكن تفكري تشتريها لو بتشتريله هدية لأول مرة:

1- برفيوم، ويفضل يكون قريب من النوع اللي بيتسخدمه.
2- حزام جلد أو كاجوال، حسب طبيعة لبسه.
3- أسطوانة للعبة بلاي ستيشن بيحبها (ريحي دماغك وهاتي أي إصدار من فيفا).
4- ميدالية فضة.
5- تيشرت فريق الكورة المفضّل عنده، وإحنا داخلين على كاس العالم.
6- مجموعة كتب تناسب ذوقه لو بيحب القراية.
7- قميص كلاسيك.. كرافتة.. جاكت لطيف.
8- أي حاجة إلكترونية هيحبها جدًا بدون نقاش.
9- ماكينة حلاقة.
10- ساعة.

تعرفي على: أجمل هدايا للأم بمناسبة الولادة

الهدايا اللي متفكريش فيها نهائي:
1- البنطلونات والأحذية، غالبًا مش هتعرفي مقاسه وذوقه بالظبط في بداية علاقتكم، ولذلك يفضل إنّك تخلّي الهدايا اللي من النواع ده قدام
شوية.
2- الدباديب والتحف الملونة، متفكريش فيها لأنها بالنسباله هدايا بنات، تفتكري هيعمل إيه بدبدوب بيغني I love you ، أيوة زي ما جه
في بالك بالظبط، هيعامله معاملة الكورة الشراب.
3- اوعي تاخدك الشهامة وتسأليه على نوع الهدية أو تقوليله "خد فلوس اشتري إنت".. اعتبري نفسك كده بتنهي العلاقة.
4- نفس الكلام مع الهدايا الجريئة حبتين، الهدايا اللي من نوعية "وأنا اللي فاكرك مؤدبة!".
5- في الخطوبة بلاش الهدايا اللي في ظاهرها له وفي باطنها للبيت من نوعية المكواة والخلاط… إلخ، أو يعني بلاش منها في توقيت عيد
ميلاده. إنتي أكيد مش هتحبيه يجيبلك طقم حلل 3 قطع في عيد ميلادك، ولا إيه؟
6- كريمات العناية بالبشرة للرجال، هيعتبرها إهانة مباشرة لو هو مش أوبن مايند شوية. نفس الكلام مع الشاور جيل ومجموعة
الاستحمام، هياخد الموضوع بحساسية "هي شايفاني مش نضيف مثلًا؟!".. ممكن ماكينة الحلاقة بحركاتها تكون حل مثالي هنا.

تعرفي على: 15 هدية تناسب صاحبتك لو جابت عربية جديدة

آخر حاجة بقى متفكريش في هدية غالية بزيادة أو لفة هدايا مبالغ فيها. يعني خليكي في المعقول والمتوسط والبساطة في التقديم، الرجالة
قليل أوي منهم اللي أوبشن الانبهار موجود عنده، فمتتوقعيش إن ردة فعلة هتكون زيك بالظبط لو في نفس الموقف.

المقالة السابقةأنا ست.. وهنجح
المقالة القادمةما هي مقاسات البرا؟ دليلك الشامل لشراء حمالة الصدر بالأرقام والحروف
كاتبة وصحفية مصرية

2 تعليقات

ترك الرد

الرجاء إدخال تعليقك!
الرجاء إدخال اسمك هنا