لسة بتاخد المصروف

457

عزة

تم نشرة في 08/26/2013

وقت القراءة : 1 دقيقة

“لسة بتاخد المصروف”.. كلمة بتتقال دايما لأي حد مبيتاخدش برأيه، كناية عن إن ده إنسان غير معترف بيه، غير معترف بفكره وعقله وسياسته وأسلوب تفكيره.

فاكرة زمان وإنتي لسة تلميذة “لسة بتاخدي المصروف” وبتاخدي فلوس الدرس وبتاخدي فلوس تجيبي لبس العيد وتاخدي فلوس عشان معزومة على عيد ميلاد ولازم هدية.. وتاخدي.. وتاخدي.. وتاخدي..؟

صحيح وقتها ممكن كان فيه شوية راحة وأنتخة، بس مسألة أخد الفلوس دي كان بيبقى فيها شوية شد وجذب ومحايلات، ويا تكسبي الجولة يا تخسريها بحجة إن اللي بتطلبيه مش ضرورة وفيه أولويات، وطبعا صاحب المال هو اللي بيحدد الأولويات دي حسب نظرته هو للأمور، اللي هي ممكن تكون حاجات مش مهمة عندك أبدا.

دلوقتي بقى لما يكون ليكي ذمة مالية مستقلة مين هيقدر يعمل معاكي كده؟ إنتي أصلا صاحبة دخل إنتي اللي هتحددي أولوياتك وتقرري تصرفي فلوسك إزاي وإمتى وليه.

أنا ليّ قريبتي لما اتجوزت جوزها قالها تسيبي الشغل وتقعدي معززة مكرّمة في البيت وأنا مسؤول عنك في كل حاجة، مفيش داعي لبهدلة الشغل، جت تعبت ومصاريف علاجها مكلّفة، وطبعا المصروف اللي بتاخده من جوزها ميكفيش أي علاج، كانت بتتكسف تطلب فلوس، والمرض عمال يزيد عليها وجوزها مش واخد باله ولا بيسألها إن كانت بتتحسن ولا لأ.

قارنيها بقى بالست اللي بتيجي تجيب لنا العيش كل يوم الصبح وتغسل سجادة هنا أو تنضف شقة هناك، بتحوّش من حر مالها عشان تعمل لبنتها فرح يشرّف، لأن جوزها بخيل ومبيصرفش، مين فيهم المعززة المكرمة الحرة اللي بتعمل كل اللي في نفسها؟ اللي بتشتغل ولا ست البيت؟!

لما تكوني زوجة خصوصا، من الصعب جدا إذلالك أو حتى انتهاك حريتك، لأن معروف إنك لو اتضايقتي ومشاكلك كترت وجبتي الآخر -لا قدّر الله- هتقدري تستقلي بنفسك، إنما لو معروف إنك محتاجة لعائل.. هيبقى إيه النظام وقتها؟ مين المعززة المكرّمة الحرة؟ اللي اشتغلت إن شالله خدامة ولا ست البيت؟! الحكم ليكي..

 

المقالة السابقةإنسان إلا ربع
المقالة القادمةعريس نص سوى

ترك الرد

الرجاء إدخال تعليقك!
الرجاء إدخال اسمك هنا