“عنده داء السيطرة وكل حاجة بالافترا.. هو ده العيب اللي فييييييييه ده اللي هيجيبنا لوراااااااا”.
دي شيرين. أنا مبحبش شيرين بالمناسبة، ما علينا يعني مش موضوعنا، المهم إن الجملة دي بتعبر عني جدًا، أنا هحكيكلو الحكاية من أولها.
كان فيه بنت اتولدت في النص الأول من شهر سبتمبر، يعني برج العذراء، البنت دي مش بتؤمن أوي بالأبراج، بس في يوم من الأيام، كانت واقفة مع مديرتها في مكتبها، ومديرتها دي كانت ست استثنائية، كانوا بيتكلموا في العلاقات، ومديرتها دي كانت مصاحباها هي وشلتها أكتر من كونها مديرتهم، المهم يعني، مديرتها قالتلها إنتي فاكرة نفسك بتعملي اللي عليكي، بس إنتي أكيد دايمًا بتعملي الصح من وجهة نظرك، الناس التانيين بيكونوا شايفين إنك مفترية، وضحكت وقالتلها إنتي برج العذراء زيي، أنا عارفة أنا بقولك إيه.
قبلها بكام سنة البنت دي كانت مصاحبة بنت تانية، البنت التانية كانت بتقولها إنتي بتمارسي أمومتك على كل الناس، ومش أمومة حنينة وطيبة والجو ده، لأ، أمومة متسلطة.
المهم مطولش عليكو (قولوا طولي)، البنت دي مؤخرًا شافت الحقيقة دي واضحة زي الشمس، البنت دي بتتخانق مع أهلها عشان بيبقى عندها وجهة نظر ما وعايزة الناس ينفّذوها بحذافيرها، والموضوع بيوصل معاها لدرجة إنها يتقول بالحرف “متفكرووووووووش ونفذوا اللي بقول عليه”.
البنت دي طول الوقت بيتم اتهامها بالقسوة، في الحقيقة هي قاسية فعلًا، هي معندهاش خُلق للتجريب، بتبقى شايفة الحلول قدامها وطول الوقت حاسة بمسؤولية عن كل اللي بتحبهم فبتحب توفر عليهم وجع القلب وتوفر على نفسها كمان، فطول الوقت (طول الوقت حرفيًا)، بتجبر اللي حواليها يتصرفوا تبعًا لوجهة نظرها وبتتنرفز أوي لو معملوش كده.
أنا عندي داء السيطرة، متسلطة جدًا، مهووسة بالتحكم في كل شيء، بدءًا من أنهي بنطلون هيليق على بلوزة أختي الجديدة لحد الكلمة اللي المفروض متنرفزش خطيبي، قسوة مش طبيعية بتضغط على أعصابي قبل ما تضغط على أعصابهم، وبتصيبني بحرقة الدم أكتر ما بتصيبهم بخيبة الأمل.
في الأول كنت مقتنعة إني مفيدة جدًا، وبالتالي إيه المشكلة لما أكون مسيطرة؟ اقبلوني باكيدج كاملة، تعايشوا مع هوس السيطرة بتاعي، عشان أنا بعمل حاجات تانية كتير حلوة، بس المشكلة الحقيقية إني أصلًا مبقبلش الناس كباكيدجات، فليه بطلب منهم يقبلوني؟
الموضوع موجع ومعقد، فكرة إنك تكون حاسس إنك بتتكلم لغة تانية غير اللي أقرب الناس ليك بيتكلموها، وفكرة إنك عارف إنك بتضغط على أعصابهم ومش قادر تكف عن ده عشان الفكرة مسيطرة على دماغك، فكرة إن طول الوقت إنت بقيت متهم بالقسوة وإنت عارف إنها مش قسوة، كل ده سوس بينخر في نفسيتك.
هوس السيطرة بيخليك تحكم على كل الناس من منظورك الشخصي جدًا، حتى اتهام الناس ليك بالسيطرة والتحكم إنت شايفه غلط، لأنك شايف إنك بس بتحاول تتصرف التصرف الصح ومش واخد بالك إن ده الصح من وجهة نظرك.
حل هوس السيطرة الوحيد هو السيطرة على نفسك، متعملش زي اللي يضيع منه قرش في الضلمة فيروح يدور عليه في شارع تاني فيه نور، إنت آه بتعمل حاجات كتير حلوة، بس مش ده المطلوب منك، إنت مطلوب منك حاجات تانية إنت شايف إنها مش مهمة زي إنك مثلًا تسيب الناس يفكروا مع نفسهم ويقرروا إيه اللي المفروض يتعمل وإيه لأ، وإيه اللي همّ طالبينه منك وتحاول فيه، مش إنك تقول لا الصح هو كذا.
وبالنسبة للناس اللي عايشين مع حاملي لعنة برج العذراء، حاولوا تشوفوا الحلو اللي فيهم، همّ آه مسيطرين وبيظهر عليهم القسوة، بس أذكيا ومبيعجبهومش الحال المايل.
وأحب أسمع أغنية شيرين “عنده داء السيييييييييييطرة”.
