عزيزتي طنط.. شكرًا لعدم سماعك كلماتي

784

 

بقلم/ نرمين صبري

 

طنط العزيزة.. أيوة الرسالة دي موجهة لطنط العزيزة اللي أي مناسبة اجتماعية سعيدة أو حزينة، اللي أي لقاء عائلي لا يخلو من طنط اللي كل ما تشوف بنت متجوزتش تمصمص شفايفها وتقول هنفرح بيكي امتي، طنط كمان متوفرة دلوقتي في عيادات الدكاترة والمصالح الحكومية ومحلات الملابس ومطاعم الأكل، طنط دلوقتي كمان أصبحت متاحة على مواقع التواصل الاجتماعي الفيسبوك والإنستجرم مع كومنت عقبال ما نفرح بيكي.

 

الرسالة دي مش موجهة لعريسي المستقبلي، لأنه غالبًا هو كمان مظلوم مع طنط، ولا موجهة لنفسي.. أنا بوجهها لطنط اللي شايفة إن كل فرصة جواز بتقدمهالنا لقطة متتفوتش وفرصة متتعوضش.

 

عزيزتي طنط.. أحب أقولك إن مش كل عريس بتجيبيه لأمثالي (بتكلم عن نفسي مش بعمم) في حزب السناجل المقبلين على التلاتين فما فوق، يعتبر لقطة. ده لقطة ليكي إنتي، ممكن حضرتك تتجوزيه.

 

عزيزتي طنط.. أمثالي من البنات اللي اعتمدوا على نفسهم وشالوا مسؤوليتهم لسنين كتير.. أمثالي اللي استوعبوا إن الواحدة مش هينفعها غير نفسها وشغلها، أمثالي اللي فيه منهم ياما سافروا لوحدهم ومنهم اللي لفوا العالم، أمثالي اللي فيه منهم عايشين لوحدهم ومستقلين تمامًا، أمثالي اللي غالبًا فهموا إن محدش في الدنيا هيحبهم قد ما أبوهم وأمهم حبوهم.. أمثالي مش منتظرين عريسك اللقطة.

 

عزيزتي طنط.. أمثالي مش منتظرين عريسك اللقطة الغني اللي يصرف عليهم ويتكفل بيهم ويشيل مسؤوليتهم، أمثالي مش منتظرين حد يعوضهم عن سنين حرمان.

عزيزتي طنط.. أمثالي منتظرين شريك، شريك حياة صعبة، شريك حياة مليئة مسؤوليات، شريك حياة البنت اتعودت تشيلها لوحدها، أمثالي منتظرين حد يشيل معاهم مش يشيل عنهم.

عزيزتي طنط.. أمثالي مستوعبين احتياجاتهم، أمثالي مستوعبين مشاعرهم، لكن أمثالي يفضلوا عيشة الوحدة عن عيشة صعبة مع شخص مستحيل مشاركة الحياة معاه.

 

عزيزتي طنط.. اهدي وارتاحي، سيبي أمثالي في حالهم، سيبينا نتونس بوحدتنا، نتونِّس بحياتنا لحين ظهور شريك الحياة، أو لحين إشعار آخر.

 

أمثالي مستوعبين احتياجاتهم ومشاعرهم

 

المقالة السابقةولكم في السايكودراما حياة
المقالة القادمةوصفة مش سريعة للكآبة المفاجئة
مساحة حرة لمشاركات القراء

ترك الرد

الرجاء إدخال تعليقك!
الرجاء إدخال اسمك هنا