عزة
تم نشرة في 11/10/2014
وقت القراءة : 2 دقيقة
سمرا؟ تخينة؟ منكوشة؟ تعالي أقولك الحل
بيقولوا ف الأمثال “صاحبك مرايتك”، يعني صاحبك هو اللي بيوريك عيوبك وأخطاءك عشان تعالجها، والصاحب الجدع هو اللي يتابعك ويحذّرك طول الوقت عشان ينقذك من عيوب نفسك.
لكن اللي حصل لما “نون” خدت عينة عشوائية من قرائها وكلمتهم عن إن فايدة المراية تعرّفك نفسك فلازم تصاحبيها، معظم البنات ردوا بإنهم بيكرهوا المراية ومش بيحبوا شكلهم، وإن المراية دي عفريت!
بنيجي ف المواقف دي أما بنلاقي واحدة مش حابة شكلها، أو بتشتكي من ديفوهات فيها ولا متعقدة من عيوب شكلية فيها، بنعمل إيه؟ بتبقى ردودنا عليها كأننا بنواسيها ونقولها “الحلاوة حلاوة الروح”.. أو نقول “يا ستي المهم الأخلاق” وساعات نجوّد بقى ونقولها “مش أحسن ما تبقي جميلة بس سمعتك بطّالة؟!”.
بس الحقيقة الكلام ده مش بيرضي البنت اللي مش شايفة جمالها.. ربط الجمال الشكلي بجمال الشخصية وتناسبهم عكسيًا مش صحيح.
كلنا مرينا بالفترة دي، ولسه بتيجي وتروح مع الحالات النفسية السيئة أو أوقات اهتزاز الثقة، وساعتها الكلام بتاع الأخلاق ده مبيطيّبش خاطر، وبيبقى كل اللي عاوزينه إن يرجع شكلنا يرضينا تاني.
كلنا عاوزين نبقى حلوين، كلنا محتاجين نشوف جمالنا ونشوف نفسنا من غير ديفوهات.
… وكلنا عندنا ديفوهات!
للأسف دايمًا المراية بتخطف العين للعيب الشكلي اللي فيكي.
طب والعمل؟!
الحل بسيط وممكن أي واحدة مهما كانت عقدتها تحلها.. إزاي؟!
إحنا مش هنخفي عيوب شكلنا بالطرق التقليدية من ماكياج لعمليات تجميل وما إلى ذلك. عارفة ليه؟
لأن العيب ده ممكن بشوية رتوش وحبة مجهود يتحول لميزة. وتبقى دائمة، مش مؤقتة زي المكياج.
بصي لمرايتك وشوفي إيه اللي مضايقك وأنا هديكي شوية أمثلة للديفوهات اللي بتعقدنا، وطرق حلها والتعامل معاها.
بصي وشوفي.. شعرك مش حلو وهايش؟
الشعر الهايش أو الخفيف لما يتعمل كيرلي بيبقى حيوي وهيديكي لوك جريء ومنطلق أحسن بكتير م الشعر الليس التقليدي.
اغسليه وسرحيه وهو مبلول واشتري نوع كويس من الـmous أو بديل الزيت وادهنيه بكمية كافية، هيدي نفس تأثير الجِل بس من غير أضرار، وهيثبّت شعرك على رسمة الكيرلي.
بصي وشوفي.. سمرا ومفيش حل لسمارك؟
إذا كنتي سمرا وعانيتي من طفولة بائسة وآسيتي من العنصرية، وطبعًا الماسكات يا دوب بتزيل أثر الزمن والمجهود، إنما مش بتغيّر طبيعة.
جربي تعملي ماكياج أفرو أو شعر راستا، البسي ستايل قريب من النوبي، متخبيش سمارك ولا تستخبي منه، اظهريه أكتروحسّي بجماله، ساعتها هتلاقيه مجرد لون بشرة زي أي لون له جماله وتبتدي تبان ملامحك.
بصي وشوفي.. جسمك مش حلو؟
حلول مشاكل الجسم بياخد وقت شوية عشان متصابيش بسوء تغذية، وغالبًا بيكون محتاج متابعة مع دكتور. على ما نوصل لنتيجة ترضينا ممكن نتعامل إزاي؟
إذا كنتي رفيعة زيادة عن اللزوم البسي فساتين مجسمة تديكي لوك المانيكانات، والبسي أكسسوار كتير وكعب بس قصير.
إذا كنتي سمينة شوية متستخبيش ف الاسود والبسي ألوان مبهجة، هتديكي خفة دم وانطلاقة، وحاولي تلبسي كعب عالي عشان نقرب من التناسق بين طولك ووزنك. واحرصي على اللياقة عشان تتحركي بسهولة وبخفة مهما كان وزنك زايد، ده هيرفع معنوياتك وبالتالي هيرفع ثقتك.
وأقولك ع السر؟ اتعلمي الرقص الشرقي، هتلاقي لياقتك اتحسنت كتير.
بصي وشوفي.. مش لاقية عيب محدد لكن شكلك مش عاجبك؟
المشكلة دي مش دايمًا بيكون سببها السهر وسوء التغذية، كتير بيبقى بسبب أزمة نفسية، أو قلة ثقة.
ثقة بنفسك مش بتتحل بماسك ولا دايت، بتتحل بانك تدعمي نفسك ف شغلك او ف هوايتك او ف علاقاتك بالناس.
الثقة هي اللي بتدعم الجمال، مش العكس.
ياما شفنا جميلات فاقدين الثقة بنفسهم وبالتالي فقدوا جاذبيتهم، إنما لو واثقة ف نفسك وروحك وشخصيتك جمالك بيظهر أكتر وحب الناس ليكي بيزيد.
ده غير إنك ممكن تمشي شوية على طرق تغذية سليمة ووصفات طبيعية مع الوقت هتفرق معاكي كتير. وتتعلمي شوية طرق سهلة للماكياج عشان بس الخروجات الخاصة.
اتأكدي إن كل مشكلة ليها حل، المهم بس متخافيش من مرايتك، دي صاحبتك الجدعة اللي بتتابعك وبتنبهك لعيوبك.
وعلى رأي اللي قال “الذكاء نص الجمال“.
