رمضان خلاص كلها كام يوم ويبدأ، وبدأت صفحات كتيرة مختصة بالمرأة أو بوصفات الطهي تنزّل منيو كامل لكل يوم. ماشي، المبدأ جميل، لكن اللي مش جميل هو إيه الأصناف الموجودة في المنيوهات دي؟! أغلب المنيو الموجودة على صفحات الفيسبوك بتكون منيوهات تعجيزية مرعبة، بتحسسني إننا كل يوم في رمضان عندنا احتفالية ووليمة، مبقدرش أشوفها غير لما أفتكر المرحوم فؤاد المهندس، وهو بيقول “ريحة صواني مفحفحة، وكوستاليتا مشوحة، وبامية خضرا مسبكة وشوربة فيها آه مستكة، وفرخة رومي محمرة”.
النماذج السابقة نقراها ناخد فكرة عامة ونفتكر إيه هي الوجبات، عشان بس مندخلش في المأساة الإغريقية بتاعة “ناكل إيه بكرة ع الفطار؟!”، بس يا ريت بعد ما ناخد الفكرة نقوم ماسحينها من الذاكرة، وده لأن الأكل عامة -وتحديدًا في رمضان- من الأفضل إنه يكون صحي قدر الإمكان، عشان كده بقدملكم النهارده مجموعة من النصايح للأكل في رمضان.
ابعدوا عن:
– يستحسن في رمضان البُعد عن الأكل الدسم المليان دهون، زي المقليات والسمنة والزبدة الكتير في الأكل، لأنه ممكن يسبب عسر هضم، ودلوقتي حاجات كتيرة بقت ممكن تتعمل في الفرن بالزيت بدل قليها، وبتدي نتيجة كويسة جدًا.
– كذلك البُعد عن الأكل المالح قوي والحرّيف اللي مليان بالبهارات، وطبعًا من ضمن النصيحة دي المخلل بكل أنواعه، لتفادي العطش في اليوم التاني للصيام.
– الابتعاد عن الأكل المليان بالسكريات الكتيرة، ده ممكن يكون تحدي كبير في رمضان نظرًا للعادات الرمضانية، من كنافة وقطايف وبقلاوة وباقي قائمة الحلويات الشرقية، بس ممكن قطعة صغيرة تكفي جدًا، مش لازم نخلص نص الصينية. وكمان الأفضل تناولها في وجبة الفطار والابتعاد عنها تمامًا في وجبة السحور، والنصيحة دي مش للرخامة، لكنها عشان تحافظ على نسبة السكر في الجسم طول اليوم.
– الوجبات السريعة، لأنها مليانة بكل الحاجات الضارة اللي ذكرتها، كميات كبيرة من الملح والدهون، أسوأ أنواع اللحوم والفراخ، من الآخر الوجبات السريعة هي الوجبة المثالية لو عايزين صيام متعب تاني يوم.
– الدقيق الأبيض والنشويات زي الأرز، لأنهم عبارة عن كاربوهايدرات اللي بتتكسر وتتحوّل برضو لسكر، وبيعمل زي ما السكر بيعمل في الجسم، عشان كده يُفضّل التقليل منهم، ودمجهم مع بروتين.
– غير مُفضّل قوي تناول الأسماك في رمضان، لأنها بتسبب شعور بالعطش، وخصوصًا للناس اللي عارفين المعلومة دي عن نفسهم، لأنها مش بتسبب عطش شديد بنفس الدرجة لكل الناس.
يُقضّل أكل:
– خضراوات، الخضراوات هي أفضل أكل ممكن ناكله في رمضان، لأنه مليان بالألياف والعناصر الغذائية اللي الجسم بيحتاجها.
– نفس الكلام ينطبق على الفاكهة، بالإضافة لأنها مصدر طبيعي للسكر، عشان أكلها بيمد الجسم بالطاقة وبكمية سكر طبيعية تحافظ على نسبته في الدم طوال فترة الصيام.
– الكاربوهيدرات المعقدة زي البطاطس والدقيق البني بكل أشكاله وكمان الأرز البني والبقوليات، لأنهم بالرغم إنهم بيتحولوا برضو في الآخر لسكر، إلا إن الجسم بياخد وقت أطول عشان يهضمها، وبالتالي بيحسسكم بالشبع لفترة أطول.
– الاستعانة بالبلح وعسل النحل كمصدر للتحلية بديل للسكر العادي.
– بين الوجبات ممكن تناول المكسرات والياميش بدل الحلويات المُصنّعة، بس طبعًا من غير ما نكتّر منها.
نظام الأكل:
– استنتاج لما سبق، أفضل نظام للفطار هو كسر الصيام بعدد وحدات من البلح (3-7) وماء وعصير وممكن شوربة كمان، البلح تحديدًا هيمد الجسم بالطاقة المفقودة طوال يوم الصيام، لأنه هيساعد في رفع نسبة السكر في الدم بطريقة معقولة وباقي العناصر، وتروي الجسم العطشان طول اليوم.
– إراحة المعدة لمدة ساعة تقريبًا بعد وجبة كسر الصيام البسيطة دي، عشان ميحصلش للمعدة صدمة من الأكل المفاجئ اللي دخلها، وبالتالي ميحصلش للجسم هبوط مفاجئ.
– بعد كده تناول وجبة العشاء أو الفطار الحقيقي، ودي من الأفضل إنها تتكون من خضار أو بقوليات ونوع من البروتين زي الطيور واللحوم الحمراء، بالإضافة للسلطة.
– السحور من المفضّل تأخيره قدر الإمكان، وإن ميحتويش على السكر المصنّع والدهون الكتيرة، ولكن من الأفضل إنه يكون فيه كربوهيدرات معقدة زي شوفان أو قمح أو فول مع لبن أو زبادي، هيحققوا شعور بالشبع لأطول فترة ممكنة، ويمدّوا الجسم بالطاقة اللي محتاجها ويحافظوا على ترطيبه من الداخل طول اليوم لحد الفطار.
– مفضّل إضافة سلطة خضراء لوجبتي السحور والفطار، فيهم فايدة كبيرة سواء من الناحية الغذائية أو ترطيب الجسم من جوة.
نصائح عامة:
– الكافيين والمتثمل في القهوة والشاي والصودا، حاولوا تقللوهم تدريجيًا من قبل رمضان، لأن غيابهم المفاجئ في صباحات رمضان بيسبب صداع وتعب وإرهاق.
– نفس النصيحة السابقة بتنطبق على السجائر لو كنتم مدخنين، بنشوف كتير من المدخنين بيتعاملوا بعصبية في فترة الصيام لافتقداهم النيكوتين في الجسم، عشان كده تقليلها تدريجيًا قبل رمضان هيساهم كتير في علاج النقطة دي.
– غسل الأسنان ضروري بعد الأكل، خصوصًا السحور، لأن وجود بقايا الأكل في الأسنان بيسبب إحساس بالعطش.
– رمضان جاي السنة دي في الصيف، وده فايدته الوحيدة إننا نقدر ناكل البطيخ والكمثرى بدون إحساس بالذنب، وفي نفس الوقت يمدوا الجسم بمقدار سكر ومياه طبيعية.
حاولوا تطبقوا النصايح دي عشان رمضان يكون ضيف خفيف عليكم وعلى صحتكم.. كل سنة وأنتم طيبين.
