دليلك للتوفير في الغربة

1861

الاعتقاد العام السائد إن أي حد مغترب بيبقى محوشهم على قلبه قد كده، لكن الحقيقة عكس كده، العيشة برة مصر غالية جدًا، ممكن تكون الرواتب كبيرة فعلاً بس الالتزامات اللي بتخرج من الراتب أكبر من الراتب نفسه، مع كل شهر بتلاقي نفسك في معركة مع الراتب ومع نفسك، إزاي الراتب يغطي تكاليف إيجار السكن، والمدارس، وطلبات البيت، والعلاج، والبنزين، وقائمة لا تنتهي من الطلبات.

 

في المقال ده هحاول أنقلكم تجربتي كمغتربة في الإمارات، إزاي بقدر أوازن الأمور المالية بحيث يتوفرلي جزء ولو بسيط أحوشه.

 

المغريات الكتير

الإمارات يا جماعة، يعني دبي والفسح والشوبينج والتخفيضات اللي طول السنة، وكل ما لذ وطاب من الحاجات اللي الواحد بيضعف قدامها، بس بما إن للغربة تمن ولازم نفكر بعقلنا عشان مستقبل ولادنا، لازم نعمل كنترول، وبما إن العروض تقريبًا طول السنة فمش لازم مع كل خروجة ويك إند تشتري، وفري فلوسك للعروض الكبيرة.

 

الحدث الأكبر في الإمارات هو مهرجان “دبي للتسوق”، ده بيكون في شهر يناير، تقدري تمسكي نفسك عن كل العروض الصغيرة وتستني يناير العظيم، لما يناير العظيم ييجي بلاش تمشي في المولات زي اللي خدتها النداهة، لازم يكون معاكي قائمة بأهم الحاجات اللي إنتي فعلاً محتاجاها. الطريقه دي هتوفرلك كل الفلوس المهدرة في خروجة كل أسبوع.

 

الإيجار البعبع الكبير

الإيجار هو البعبع الحقيقي لكل مغترب في الإمارت؛ الإيجارات في الإمارات غالية جدًا، يعني إيجار شقة غرفتين وصالة في مكان متوسط ممكن يوصل لـ50 ألف درهم في السنة. طب الحل إيه؟ أولاً لو شغلكم في دبي فاوعي تأجري سكن فيها؛ الإيجارات هناك مرتفعة جدًا، ممكن تختاري أي إمارة قريبة من دبي زي الشارقة أو عجمان مثلاً. تاني اقتراح للتوفير في السكن، لو إنتم عيله كبيرة فالبيت العربي هو الحل المثالي ليكم، من حيث المساحة والسعر والخصوصية.

 

المدارس

المدارس تاني أكبر بعبع بعد السكن على طول، أسعار المدارس في الإمارت غالية جدًا ومكلفة، خصوصًا لو عندك أكتر من طفل، على الرغم من كده فيه تنوّع كبير في أنظمة التعليم هناك، بما يتناسب مع ثقافة الوافدين وجنسياتهم المختلفة. هحاول أعرضلكم أكتر من اختيار للمدارس إنتم اختاروا الأوفر والأفضل ليكم:

“مدارس السفارة” ودي معناها إن ابنك يفضل في البيت ويتعلم المنهج المصري ويمتحن في السفارة المصرية، ومصروفاتها بسيطة جدًا.

“المدارس الحكومية” ودي مدارس بتدرس المنهج الوطني للإمارات ومصروفاتها مخفضة.

“المدارس الخاصة” ودي مصروفاتها في حدود 5 آلاف درهم في السنة.

“المدارس الدولي” ودي فئات كتير، بتبدأ أسعارها من 10 آلاف درهم لحد 80 ألف درهم أو أكتر. حاولي تختاري الأنسب لولادك ولظروفك المادية.

 

المواصلات

المواصلات في الإمارات مريحة جدًا، هى في حد ذاتها فسحة، بس غالية جدًا (معندهمش حاجة رخيصة). عشان توفري، الأفضل ليكي إنك تطلعي رخصة سواقة إماراتية، على الرغم إن تكلفة استخراج رخصة شيء مكلف جدًا، أنا شخصيًا الرخصة كلفتني 10 آلاف درهم، بس في المقابل هتوفر عليكم مصاريف تانية أكتر، منها اشتراكات الأوتوبيس المدرسي، يعني لو أسرة عندها 3 أولاد في المدرسة هتوفرلهم في السنة 20 ألف درهم تمن الباص، بالإضافة لتوفير تمن المواصلات الخاصة بمشاويرك الشخصية وخروجات الولاد.

 

مصروف البيت

التحدي الأكبر في التوفير، على عكس المدارس والمواصلات والإيجار اللي تمنهم بيبقى معروف ومتحدد ومفيهومش فصال، فمصروف البيت هو كلمة السر للتوفير. ممكن تشدي الحزام فيها وتوفري. حددي الأكلات اللي هتطبيخها طول الشهر واكتبي مكوناتها. ثانيًا حددي تموين البيت الشهري اللي بتحتاجيه من زيت وسكر ورز وخلافه، ثالثًا ودي أهم نقطة.. نزلي أي أبلكيشن من اللي بتحددلك أماكن العروض سواء كارفور، أو جمعية الاتحاد، أو أي سوبر ماركت من الكبار، زي نيستو أو المنامنه. اختاري أوفر العروض واتأكدي من تاريخ صلاحية المنتجات واشتري منها فورًا. بالنسبة للخضار نصيحة اشتريه من الأسواق أوفر من السوبر ماركت بكتير.

 

تذاكر الطيران

لو شغلك مش بيوفرلك حجز تذاكر الطيران فإنتي مش قدامك غير الطرق دي عشان تحاولي تقللي التكلفة.

أولاً: بلاش تنزلي أجازة في المواسم (الأعياد، رأس السنة)؛ التذاكر بتكون غالية جدًا.

ثانيًا: احجزي في العروض، أحيانًا شركات الطيران بتقدم عروض على تذاكر الطيران وبتخفض تمنها بشكل كبير. عيب العروض الوحيد إن ممكن توقيت حجز التذاكر أثناء العرض يكون قبل ميعاد سفرك بشهور، ممكن خلال الفترة دي تحصل أي ظروف فتلغي الحجز وتخسري.

تالت اقتراح: رحلات الطيران اللي خط سيرها فيه ترانزيت بتبقى أقل تكلفة من الرحلات المباشرة، ممكن تحجزي على واحدة منهم.. وإحنا بنتمنالك رحلة سعيدة.

 

حمد الله على السلامة.. فين الهدايا؟!

“تهادوا تحابوا” كلنا بيبقى نفسنا نهادي أصحابنا وقرايبنا وأهلنا وجيراننا، بس العدد في الليمون والتكلفة مع العدد الكبير بتضرب في أرقام فلكية، والشيء المؤلم إن أحيانًا رغم اللف والتعب في البحث عن الهدايا المناسبة لذوق كل شخص، بتلاقي الهدية معجبتش، عشان كده حددوا أهم الأشخاص الغاليين عليكم وهادوهم بحاجات بسيطة، بلاش تحمِّلوا نفسكم أكبر من قدراتها. ونصيحة لكل معارف وجيران المغتربين.. رفقًا بيهم يا جماعة ميصحش كده.

 

افتحي حساب في البنك

بعد ما الجنيه عام وشبع عوم، الأفضل إنك متحوِّليش فلوسك اللي هتتوفر معاكي لجنيه، لأن ده هيعرضك للخسارة، وهيضيع كل النصايح اللي فوق. الحل الأمثل إنك تحوِّلي الدراهم لدولارات، الدولار أمان أكتر، عشان كده افتحي حساب بالدولار، حطي فيه أي مبلغ يتوفر معاكي من مصروف البيت مهما كان صغير.. طريق المليون بيبدأ بخطوة.

 

وأخيرًا.. الغربة مش دايمة، استمتعي بوقتك فيها، اتفسحي واخرجي بس في حدود المعقول، وفري بس متبخليش على نفسك، وفي نفس الوقت اعملي حساب إنك راجعة بلدك تاني، فلازم ترجعي في مستوى مادي مريح ليكي ولأولادك.

المقالة السابقةالمرض الخبيث
المقالة القادمةتجديد البيت بأقل التكاليف: تجديد البيت بأفكار بسيطة وديكورات رائعة
صحفية وكاتبة مصرية

ترك الرد

الرجاء إدخال تعليقك!
الرجاء إدخال اسمك هنا