حياتها مش Black

740

شفت فيلم Black؟

أنا شفته، وهحكيلكو عنه.

 

مش هحكي عن مدى جودة صناعة الفيلم، بدءًا من السيناريو مرورًا بالتصوير انتهاءً بالتمثيل.

 

مش هتكلم مثلًا عن المشهد اللي الأب فيه راح يقول للأم إن ميشيل صماء وكفيفة، من غير دراما كتير، الكادرات في المشهد ده كانت عبقرية ومسرحية جدًا، بس أنا مش هحكي عنها.

 

مش هحكي عن مشهد مستر ساهاي وهو بيحكي عن مشواره قبل ما يمشي ويسيب المدرسة، مش هحكي عن المشهد اللي شفايف مستر ساهاي لمست فيه شفايف ميشيل لأول وآخر مرة، ولا نظرة مستر ساهاي لحظتها.

 

مش هحكي عن مشاهد مستر ساهاي لما بينسى، وهو حاضن الكتب، أو وهو ماسك الآيس كريم ف إيده وماشي مش عارف رايح فين.

 

مش هحكي عن رقص ميشيل في كل مرة بتفرح فيها، مش هحكي عن ميشيل وهي بتصرخ لما حست بالسلاسل رابطة مستر ساهاي في السرير.

 

وطبعًا، مش هحكي عن ميشيل الصغيرة، لأن اللغة لسه مخترعوش ليها حروف تعبر عن عبقرية البنت دي وجمالها.

 

مش هحكي عن الحاجات دي عشان الحكي فيها مكرر، أكيد فيه ريفيوهات كتير اتكلمت عن الفيلم من الجوانب دي، وإلا مكانش الفيلم اتشهر أوي كده وكل الناس حبته وسمعت عنه، ممكن تدوروا على جوجل العظيم وتشوفوا الناس قالوا إيه عن جودة الفيلم السينمائية.

 

أنا عايزة أتكلم عن الآيس كريم قبل ما يسيح، مستر ساهاي كان بيقول لميشيل إن الحياة آيس كريم ولازم تاكلها قبل ما تسيح، أنا بقى بحب الآيس كريم أوي، وأحب أتكلم عنه في كل مناسبة.

 

كام مرة حسيت فيها إن الآيس كريم بتاعك ساح ومبقاش نافع تلمه من الأرض وتاكله؟ وكام مرة حسيت فيها إن الآيس كريم بتاعك ساقع أوي على سنانك وقدامك حل من اتنين يا تاكله وتؤذي أسنانك، يا تسيبه لحد ما يسيح شوية عشان ساقع أوي، وفي الحالة دي هيبقى عصير مش آيس كريم؟

 

أنا هتكلم عن نفسي، أوقات كتير أوي بحس إن الآيس كريم ساح ومبقاش ينفع آكله، معرفش لو كنت مكان أم ميشيل كنت حسيت بإيه، أكيد مكنتش هبقى في صبر مستر ساهاي ولا علمه ولا كنت هعرف أخرّج ميشيل من ضلمتها، أعتقد كنت هبقى زي أبوها، اللي كان رافض وجود مستر ساهاي وعايز يحمي بنته من الألم اللحظي اللي بيسببه ساهاي، ومش قادر يشوف إن وجع ساعة ولا كل ساعة.

 

معرفش كنت هحس بإيه لو كنت مكان ميشيل وحسيت بالدنيا بتتفتح قدامي وأنا مش قادرة ألمسها ولا أعيشها، كنت هبقى زيها بستمتع بالمتاح ليّ وبرقص لما آخده من الدنيا، ولا كنت هزعل عشان مش عارفة آخد باقي الامتيازات اللي واخدها كل البشر.

 

مش عارفة كنت هحس بإيه لو كنت مكان مستر ساهاي، وحلم حياتي اللي عشت عشانه 18 سنة مش قادرة أحققه، وكل سنة بفشل فيه، كنت هحتفل مع ميشيل بسقوطها في الامتحان ولا هثور وهغضب وأحس إني عملت كل اللي عليّ من غير مقابل.

 

أعتقد إني كنت هسيب الآيس كريم بتاعي يسيح، ومكنتش هشوف إني ممكن ألحق منه حاجة، أنا بطبعي عجولة جدًا ومعنديش صبر، إنما مستر ساهاي وميشيل عكس كده تمامًا.

 

الفيلم بيحطك في حالة نبيلة جدًا من التفكير، عبر قصة كلنا عارفينها لأن كلنا –تقريبًا- سمعنا عن هيلين كيلر وأخدنا درس عنها في كتاب القراءة في المدرسة، إنما الفيلم بيدخلك الحياة دي بنعومة ويسيبك تفكر إنت كنت هتتصرف إزاي.

 

هتضطر لما تتفرج ع الفيلم تفكر كتير، هو أنا مستمتع بحياتي زي ميشيل رغم عدم امتلاكها لأقل ضرورات الحياة رغم إن عندها فلوس كتير؟ هو أنا قادر أبقى مستر ساهاي وأطوّع حياتي عشان الحلم اللي نفسي أحققه؟

 

هتضطر لما تتفرج ع الفيلم تسأل نفسك، هو أنا لسه بحس كويس؟ طب بفكر كويس؟

طب أنا لسه بحلم كويس؟

 

الأبجدية اللي كان بيعلمها مستر ساهاي لميشيل كانت بتبدأ كالتالي: B. L. A. C. K مستر ساهاي قرر إنه يحول مأساة حياة ميشيل لأبجدية، وقرر يولد منها نور تعيش فيه ميشيل حياتها عشان تعرف إن الـBlack مكانش وحش أوي، وإنه كان ضروري عشان تخرج للنور.

 

وإنت.. مأساة حياتك اللي هتعمل منها أبجدية تعيش بيها، حروفها إيه؟

المقالة السابقةقنوات الأطفال فيها سم قاتل
المقالة القادمةالعصاية السحرية لدوام شبابك
كاتبة وصحفية مصرية

ترك الرد

الرجاء إدخال تعليقك!
الرجاء إدخال اسمك هنا