بقلم/ دينا الد
1) الحمل بكل تعبه بيتنسي من أول لحظة الولادة؛ لأن تعب الولادة الحقيقي بينسي أي حاجة، والعالم الجديد اللي بتدخليه خصوصًا لو أول مرة بتفاصيله الكتير بيشغلك عن كل اللي حصل قبله.
2) أول لحظة أمومة حقيقية هي لما بتشوفي البيبي وتلمسيه، وهي لحظة فيها مشاعر كتير ولخبطة وفرحة، محدش بيعرف يوصفها في الكتب، ولا إنتي أصلاً بتكوني عارفة تتخيلي جمالها قبل ما تعيشيها.
3) الناس مش هترحمك، من أول لحظة هتفتحي فيها عينك بعد الولادة هتبدأ مرحلة النصايح في كل حاجة، من أول لبس المولود وخدي بالك من البرد، حتى لو ولدتي في أغسطس، لحد متشيليش كده ومترضعيش كده.
4) جروبات الفيسبوك والفيديوهات والكتب اللي هتقضي فترة الحمل كلها بتتابعيها مش هتعرفك كل حاجة تخص البيبي مهما تابعتيها، يعني مش هتلاقي فيها تفسير منطقي إن الطفل يكون نايم وأول ما تقومي تشربي تلاقيه اتفتح في الصريخ لدرجة إنك تقرري مش لازم أشرب. أو إنه يبقى بيزن وإنتي شايلاه وأول ما حد تاني ياخده منك يسكت.
5) لحظات تأنيب الضمير تتناسب طرديًا مع كونك قريتي كتير وكونك واعية.
6) أكتر حاجة ممكن تريحك شوية من الشيل والحط الكتير في المرحلة دي إن جوزك يقولك إنك أم كويسة وزوجة عظيمة، بالرغم من تقصيرك اللي حاصل غصب عنك، أو إن جوزك ياخد البيبي ساعة واحدة بس لحد ما ترتاحي شوية.
7) الولادة هتعلمك السرعة وهتعيشي فيها تدريب عملي لترتيب الأولويات، يعني مثلاً نفطر الأول والشاي يبقى بعدين، أو نحط الغسيل في الغسالة الأول وبعدين نفطر.. وهكذا.
8) استخدامك لموبايلك هيتغير، ومش هيبقى وسيلة اتصال قد ما هيبقى وسيلة تنبيه لدوا المغص ومواعيد الرضاعة وحاجات كلها ليها علاقة بالبيبي.
9) اللبس اللي مكنتيش بتلبسيه وقت الحمل من المحتمل جدًا إنك متعرفيش تلبسيه، لأن الرضاعة محتاجة لبس معين، وحتى المشي بالبيبي في الشارع محتاج لبس معين.
10) الناس اللي كانوا أمهات قبلك وبيحاولوا في أي نقاش معاكي إنهم يعلوا عليكي خصوصًا لو عملتي حاجة غلط، دول ناس ملهمش أي رادع، والمجهود اللي هتضيعيه في الرد عليهم ابنك أو بنتك أولى بيه.
11) فترة الولادة فترة مرهقة، وطبيعي هتلاقي اللي يقف جنبك وهتلاقي كمان اللي يخذلك.
12) الأمومة مش سهلة إطلاقًا.
كل اللي هتتعلميه فترة الحمل مش هتعلمك حاجة عن البيبي
أم لأول مرة، الأمومة، الولاة
