افكار تجهيزات رمضان، تجيهزات السفرة وأول يوم في الشهر الكريم

1464

رمضان هيهل بكرة خلاص، ورمضان للأسف بيكون وقته محدود إلى حد كبير، خصوصًا لو الراجل والست في البيت بيشتغلوا، وأكتر كمان لو عندهم أطفال، الصيام مع الحر بيخلوا تجهيز الأكل يوم بيومه من الأمور الصعبة جدًا، عشان كده بتلجأ كتير من الأسر لتحضير وجبات أو أجزاء من وجبات في رمضان، عشان تساعدهم في التحضير، وعشان كده حاولت أجمع أكتر نصايح ممكن تساعد في تحويل مهمة الطبخ في رمضان لمهمة يومية سهلة بدون عذاب.

لسبب غامض غير مفهوم، رمضان مشهور بالمقليات، فلو إنتم متعودين على أكلها في رمضان، جهزي كمية منها في الفريزر، متنوعة ما بين قطايف حادقة وحلوة وسمبوسة وسبرينج رولز كمان، بشكل شخصي بحب الحشو البسيط زي الجبنة البيضا مع النعناع، أو الجبنة الكريمي مع البسطرمة. حطي كل كمية تكفي مرة واحدة مع بعض واحفظيها في الفريزر، ومتنسيش إن القطايف مينفعش تتشال بدون حشو لأنها مش هتمسك، ولازم أول ما تتجاب تتحشي وبعدين تتشال.

لو من محبي الخشاف، جهزي أكياس للاستخدام مباشرة، يعني كل كيس بيكفي يوم، وبيحتوي على الزبيب والبلح والقراصيا والمشمش والتين، بحيث إن كل مرة تيجي تجهزي فيها الخشاف الكيس يكون جاهز للاستخدام مباشرة بدون الحاجة لفتح كل الأكياس تاني.

رأيي الشخصي قللي من البانيه في رمضان، البانيه مش زي ما هو شائع إنه أسهل أكلة، على الإطلاق يعني، قطعة البانيه بتكون كبيرة وغالبًا طاسة القلي مش بتاخد أكتر من 3 قطع، وده بياخد وقت كتير في العمل وهدر أكبر في زيت القلي، عشان كده أفضل حاجة تجهزيها لرمضان هي الأكلة اللي حجمها صغير، زي الكفتة بأنواعها والشاورما وقطع الدجاج المتبلة اللي هتدخل الفرن مباشرة. تبّلي تتبيلتك الاعتيادية، بس بدل ما تحطيها على النار حطيها في كيس أو طبق محكم الغلق في الفريزر.

ملحوظة: بلاش التتبيلة يكون فيها خل أو بصل مفروم ناعم، لأن الطعم ممكن يغيّر.

أما لو قدرتي تعملي صينية واحدة جلاش أو رقاق أو بشاميل، والفريزر عندك يساع لحاجة زي كده، فمتتردديش واعمليها، لأن أكيد هتعدي أيام محدش قادر حتى يقف يعمل غير فعل بسيط جدًا في المطبخ وهو إشعال الفرن، فلو تجهيز وتخزين حاجة زي كده متاح عندكم متترددوش في عمله.

أنا بحب الخضار جدًا، بس تجهيز الخضار لكل وجبة شيء مرهق، خصوصًا لو الخضار اللي هيتجهز هيكون بشكل عادي، زي إنه يكون للشوربة أو للطبيخ، عشان كده تجهيز الخضار وتقطيعة وتخزينه في الفريزر بالكميات المستخدمة في الأكلات، حاجة هتسهّل الدنيا جدًا، خصوصًا إن أغلب الخضار ممكن يدخل الفريزر عادي، بسلة وجزر وفاصوليا، سبانخ وملوخية وقلقاس، وفيه أنواع تانية كمان ممكن تتجهز زي البطاطس والخرشوف، بس بتحتاج ترتيبات الأول، مينفعش تدخل الفريزر مباشرة، وكمان الكوسة ممكن تتخزن في الفريزر على طول، بس الطازة طعمها بيكون أحلى.

من أكتر الحاجات اللي كنت بستخدمها زمان هي معجون الصلصة، لأني بطبيعة الحال كنت بكسِّل جدًا في كل أكلة أعصر طماطم، حتى لو كانت مجرد إني أرمي شوية طماطم في الخلاط، كانت خطوة إضافية ومواعين زيادة ملهاش لازمة، لحد ما وصلت لتخزين الصلصة في الفريزر، وده بيوفّر وقت كتير وادّانا خيار صحي أفضل. عن نفسي بشيل الصلصة النيّة لأني بطبخ الأكل نيّ في نّي، أما لو كنتو من أنصار المتسبِّك فشيلوها في الفريزر متسبكة.

نفس الحكاية بالنسبة للشوربة، سواء الفراخ أو اللحم، تجهيزهم في الفريزر لو إنتو بتستخدموهم في الأكل هيكون أفضل من استخدام مكعبات الشوربة.

البصل والثوم المفرومين، بيسهّلوا كتير جدًا في شغل المطبخ لو اتفرموا مرة واحدة واتشالوا في الفريزر، طعمهم بيكون زي الطازة، بس لأن استخدامات البصل مختلفة بتخلي الكمية المستخدمة مختلفة، ولأن الثوم الطبيعي استخدامه مبيكونش كتير، فأفضل الطرق لتخزينهم هي فردهم في الكيس البلاستيك لطبقة رفيعة جدًا، بحيث يبقى سهل تتكسر منه قطعة على قد الاستخدام ومن غير معاناة.

اللحم المفروم المتعصَّج هو الجوكر اللي بيمشي مع كل الأكلات، عشان كده تخزين كمية منه في الفريزر بحيث إنه يطلع على الاستخدام مباشرة، هي حاجة بتوفّر جدًا في الوقت، ولأنه جوكر زي ما قلنا، فهو ممكن يمشي مع المسقعة والمكرونة بالبشاميل والكوسة بالبشاميل، وأي حاجة بالبشاميل عامة، والمكرونة بالصلصة والبامية والجلاش، وجوده جاهز في الفريزر هيسهّل حاجات كتيرة جدًا.

كل اللي فات ده كان الفطار، أما بالنسبة للسحور فالبليلة اختيار ممتاز، لأنها غنية بالألياف اللي هتساعد في عدم الإحساس بالجوع طول نهار رمضان، ولأن مش معقول كل يوم هنعمل بليلة مخصوص، فممكن كمية من البليلة تتسلق وتتشال في الفريزر إما بطريقة الكميات المجزأة على أكياس، وإما بطريقة الفرد في الكيس البلاستيك والتكسير منها زي الثوم والبصل، وكل اللي هيتبقى هو إنها تفك ويتضاف عليها لبن سخن على النار.

ملحوظة: فيه طريقة جميلة لقفل الكيس البلاستيك أو إعادة قفله بعد فتحه، وهي تسخين سكينة وتمريرها مكان ما الكيس المفروض يتقفل، الكيس بيتقفل بفعل الحرارة، وبتكون طريقة شيك جدًا لقفل الكيس وإعادة قفله عدد لا نهائي من المرات، وبتكون مفيدة في حالات التخزين بطريقة الفرد اللي قلتها في تخزين البصل والثوم.

أخيرًا.. أكيد رمضان مش شهر الأكل ولا شهر الهم على البطن، بس ضروري إننا ناكل فيه عادي، وتجهيز بعض الأكلات للمساعدة في عمل الفطار أمر مش ضروري لكتير من الناس، بينما هو شديد الأهمية لبيوت تانية مش بيلاقوا فيها الوقت ولا الصحة لوقفة المطبخ في عز الصيام والحر، ممكن تجهزوا أكل أسبوعيًا، مش للشهر كله، خصوصًا إن ممكن الفريزر ميكفيش أو على آخر الشهر تلاقوا نفسكم مش عايزين تستخدموا اللي جهزتوه في أول الشهر. وفي النهاية مش المقصود بالتجهيز هو عمل مآدب بطريقة over في رمضان، وإنما توفير الوقت والمجهود.

المقالة السابقةللسينجل ماذر: كيف تتجنبين علاقة بائسة مع أولادك؟
المقالة القادمةأجمل أفكار زينة رمضان للبيت، زينة بالورق، بالفوم، بالخيامية

ترك الرد

الرجاء إدخال تعليقك!
الرجاء إدخال اسمك هنا