لكل الناس اللي بتحب القطط أو مش بتحب القطط، لكل اللي ناويين يربّوا قطط أو يسربّوا قطط عندهم، لكل اللي بيخاف/ بيتحاشى/ بيقرب على استحياء وبينكش القطط من بعيد أو قريب، القطط مش مجرد حيوان أليف. في السطور القادمة ومن واقع خبرتي في كيفية تربية القطط، هشاركك بالتفصيل كل ما يتعلق بتربية القطط حديثة الولادة وهل تربية القطط لها أضرار وتسبب الأمراض أم لا؟
كيفية تربية القطط
أهم معلومة في كيفية تربية القطط، إنك لو شخص متربي مع القطط هتعرف إنها ممكن تبقي صاحبك، المنبه بتاعك، حيوانك الأليف، كاتم أسرارك، إنت بس على شكل قطة وم الآخر القطط ممكن تبقى أي حاجة.. أي حاجة، لو بس بينكم عشرة طويلة مبنية على الخربشة والضحك والأكل من طبق واحد، لحد ما القطط بتبهت على شخصيتك وبتبقوا شبه بعض أوي، بتعلمك إمتى تبقى هادي وإمتى ضوافرك تخربش.. جميل؟
أنا شخصيًا علاقتي بالقطط مبدئتش بشكل إيجابي.. ماما كانت وما زالت بتعشق القطط، وبناءً عليه كانت القطة جزء من حياتها بعد الجواز، بس لسبب أو لآخر قررت تمشي القط مشمش يوم سبوعي.. القط مشمش عشرة سنين كتير مشي عشان نونة جديدة جت البيت.
بعد شوية سنين بدأت أزنّ إني عايزة قطة، وجه مشمش التاني، ومن يومها توالت القطط مشمش في حياتي.. في حياتنا عمومًا، وكأني بصالح مشمش اللي مشي يوم ما اتولدت.
- مبدأيا اوعي تعامل القطة أو صاحبها إن وجود القطة ده شيء من الرفاهية في حياة البني آدم.. لأ، إطلاقًا.
اللي بيربي قطة بيبقى عارف إنه بيختار صاحب. - لو إنت عندك اكتئاب موعدكش إن القطط هتخليك فرحان وطاير فوق السحاب.. بس ع الأقل هتشاركك وهتتقبل ضربة بوزك ومش هتبطل تستقبلك أول ما تدخل من الباب مكشر.. خالص.
- لو مبسوط أو فرحان وعندك قط سيامي/ بلدي/ رومي.. قابل بقى التنطيط والشقلبظات اللي هتعيش فيها فترة مش قليلة.. احتفال يا برنس.
- لو ليك تاريخ لا بأس به مع القط بتاعك، نام وإنت متطمن إنك مش هتروح عليك نومة، هيصحيك في نفس معاد كل يوم باستثناء يوم الأجازة.. أيوه ده حقيقي.
- القط لأنه بيشاركك كل لحظات حياتك.. فهو أكتر واحد هيحافظ على حاجتك في غيابك، مش من منطلق إنه بيحرسهالك، أبسولوتلي..لأنه بيعتبرها حاجته هو كمان، بما فيها هدومك، اللاب توب، موبايلك، سريرك، دولابك… وهكذا) وده بينفي نظرية إن القط غدّار وإن القطط مش زي الكلاب.. خدعوك فقالوا!
- القطط مش غدارة، القطط بتعرف مين بيحبها ومين لأ.. والحقيقة لأنها مش سو كيوت للدرجة اللي تخليها تبعد عن اللي مبيحبهاش من غير ما تنكشه.. آه القطط أشقيا ولو ضربتها أو بصيتلها بطريقة وحشة أو اتكلمت عنها بطريقة مش تمام.. هتشيلهالك يا معلم وهتضايقك بشكل أو بآخر.. خلي بالك بقى.
- إنت بترفض تاكل معايا في طبق واحد! ده لسان حال كل قط وقطة بتربيهم يوم ما تمشيهم من جنبك وإنت بتاكل، بعيدًا عن نظريات القرف والأمراض واليع، لو لسّه مكلتش عيش وملح مع القط بتاعك يبقى إنتو لسّه مبقيتوش أصحاب أنتيم. مش لازم ف نفس الطبق أوي، يعني بس ممكن تاكلوا في نفس التوقيت جنب بعض.
هل تربية القطط في المنزل يسبب العقم عند البنات والشباب؟
بعد ما اتعرفنا على كيفية تربية القطط في خطوات سريعة، تيجي فقرة الأسئلة الشائعة عن أضرار تربية القطط وأمراض التي تسببها القطط؛
علميًا تربية القطط بتساعدك في تقليل نسبة حدوث بعض الأمراض، زي ضغط الدم، السكتة القلبية، الشعور بالوحدة، وجع العضم.. سبحان الله!
القطط مبتسسببش العقم، أي طبيب أمراض نساء ممكن يؤكد هذه المعلومة، ولكن القطط ممكن تكون ناقل للتكسوبلازما المسببة للعقم إذا لامست بشكل مباشر برازها أو فضلاتها، لكن تربيتها مع الاهتمام بالنظافة والتعقيم بشكل عام لا تسبب العقم للشباب والبنات ولا تؤثر على الحمل لاحقًا إلا في حالات الحساسية الشديدة أو كان لطبيب النساء راي أخر حسب حالاتك وتاريخك المرضي.
هل تربية القطط لها أضرار؟
علشان نجاوب هل تربية القطط لها اضرار ممكن تسأل نفسك الأول ليه ممكن تربي قط؟ وبالتأكيد هتلاقي سبب مقنع. القطط بتجعل صاحبها يتعافى من الشعور بالوحدة، بتضيف شيء من المرح والسعادة في البيت ولو في أطفال فالقطط كفيلة تعلمهم المسؤولية والرحمة والرفق بالحيوان.
تربية حيوان أليف بصورة طبيعية لا يمكن تضر صاحبها، إلا في بعض الحالات المرضية فقط، ولكن بشكل عام ففوائد تربية القطط تجعل أضرارها تكاد لا تذكر.
القطط. بتتحلى بقدر كبير من التناكة، همّ مش ناسين أبدًا إنهم في زمن ما أيام الفراعنة كانوا بيتعاملوا كآلهة مقدسة، ولمّا كان قط يموتكان صاحب القط بيحلق شعره وشعر الحاجبين تمامًا حداد على القط.
القطط بتغير.. هتغير عليك من أي حاجة تاخدك منها فترة طويلة، أيًا كانت.. وأحيانًا رد فعلها بيبقى عنيف.
وأخيرًا اتمنى تكون نصائحي البسيطة في كيفية تربية القطط والعناية بيها فادتكم، عادة حكاياتي مع القطط مبتخلصش.. من أول أحلى تحقيق صحفي عملته عبارة عن القطط في الزمالك.. مرورًا بقطط تركيا اللي كانت بتمشي ورايا في كل شارع.. ومؤخرًا القطة المشمشية قاطنة مبنى الشغل! الدم بيحن. مش كده؟!
