لسعادة اللي حكولنا عنها ف حواديت السندريلا وسنو وايت ملهاش وجود.. النهايات السعيدة اللي اتحكت ف الحواديت مش واقعية.. الواقع مفيهوش نهايات سعيدة. مفيهوش نهايات أصلاً. إحنا طول الوقت بنلف ف دواير.
ف إحنا مش هنستنى المشاكل تنتهي.. وهنعيش.
هو آينعم النهايات السعيدة مش متاحة، لكن السحر اللي بيسيّر الأحداث ويصنع الساسبينس على مدار الألف ليلة وليلة موجود.
موجود جوة كل ست وهي بتألف طبخة وتجرب تضيف نكهة عمرها ما شافت حد بيستخدمها مع الأكلة اللي بين إيديها.
أو وهي بتجرب ستايل لبس متصورتش إنها هتقدر ف يوم تمشي بيه ف الشارع.
أو مثلًا وهي بتكتب شوية شخبطة وتخبيها ف الدرج عشان محدش هيفهمها إلا هي، هي بس اللي عارفة إنها قدرت تشاور بالعصاية السحرية اللي بين إيديها وتطوّع الحروف والكلمات وتخلق م اللغة أحاسيس جديدة تقشّر الترسبات اللي على روحها، ويطلع قلبها شفاف واضح كل اللي جواه.
وأنا بقى سحري الخاص كان ف الوصفات السحرية اللي بخلطها بإيدي وأقرا عليها التعويذة، بعدين أستخدمها وأشوف السحر.. إني أحافظ على جمال البنات وأخليهم يفضلوا شباب.. وإني أفك كرب المنفصلات وأوّنس قلوب الوحيدات وأطبطب على روح الحالمات.
سحري الخاص كان اختراع الماسكات الطبيعية، أنزل للعطارين أجمع حاجات وأخلطها وأوزع ع البنات.. تاخد الخلطة وتفردها على وشها بعد المغرب لما تروح كل الهموم والشوارع تتقفل، وميبقاش فاضلها غير نفسها.. ف ليلة القمر فيها بدر، وتفكر بس ف جمالها.. تكثر م الاستغفار وطلب السماح من روحها.. 15 دقيقة وتزيح عنها مُرّ الدوا.. وتشوف أثر الوصفة السحرية.
يوم ورا التاني، أسبوع ورا التاني، تمشي ع الوِرْد اليومي وتيجي تكلمني عن كُتَل الهموم اللي دابت من وشها، وعن أوجاع السهر اللي كانت نافخة جفونها دموع محبوسة والوصفة سرّبتها.
وانهارده.. قررت أنشر أهم الحاجات اللي اتعلمتها ف كتب السحر بتاعتي.
خطوات أساسية لأي بشرة
– الوصفات مش بالمقادير زي ما بيعلموكي.. ده شغل المبتدئين، الوصفات بالسينس، باحتياجك ليها، مثلًا يعني.. لو بشرتك زعلانة وباهتة بتزودي المادة المبيضة ف الوصفة.. لو عطشانة ووحيدة بتزودي نسبة المادة المرطبة، لو خارجة من تجربة مُرّة بتحتاجي لمنظف عميق.
– أما بتخرجي من إنتر فيو مهم مثلًا أو مناسبة سواريه بتحتاجي بعدها تخلعي الفورمال وتلبسي بيجامة قطن مريحة وترجعي لطبيعتك، شيلي كل آثار الميكاب والاصطناع ونفضي بشرتك وروحك من كل الأقنعة.
– لو عندك معاد مع شمس الصباح الباكر فهتبقي محتاجة تقابليها بدون طبقات تحجز وشك عن ضوئها، اخرجيلها بكامل طبيعتك من غير ماكياج، وخلي الضوء يتخلل بين مسامك ينور قلبك.. ولو شمس العصر بلسعتها روّضيها وبلاش تعانديها. بلاش ماكياج خالص مع أي شمس، الشمس واضحة وتحبك واضحة من غير زواق.
نصايح ف الحالات الخاصة
– مهما كانت حساسيتك مفيش حاجة إنتي ممنوعة منها، كل الموضوع إنك بتحتاجي عوامل مساعدة تحميكي من ضرر التجربة.. يعني مثلًا لو بشرتك حساسة ومش بتتحمل لسعة الليمون لكن اسمرار الجلد محتاج ليمون.. بتضيفي عليه مادة مرطبة زي الزبادي تطبطب ع الجلد وتهدي خوفه.
– لما تكتر مشاكلك رتبي أولوياتك.. اتخلصي من همومك وكل اللي بيمنعك تتنفسي بحرية، بعدين دوّري إزاي ترجعي تنوري تاني.. ف الآخر ضيفي الزواق اللي بيظهر جمالك أكتر.
التنضيف بعدين التفتيح وف الآخر الترطيب.
– مفيش مكونات متناقضة؛ تقدري تجمعي بين حاجتين محدش جمع بينهم غيرك. الأبيض على الأسود مش هيلاشوا بعض.. هيطلعوا رمادي، لون تالت خالص يشبه أصالة الأرض.. الطمي المغربي بكل جفافه وشدّه للوش مع الزبادي المرطّب اللين مش هيديكي معادلة صفر.. إنما هيديكي ماسك تفتيح وصنفرة أكبر شركات التجميل معرفتش تعمل زيه.
وصفات سحرية شائعة
– الدموع الحارة المحبوسة ف عينك اللي كونت أكوام سودا وحفرت السهر على وشك، دوّبيها بمكعبات تلج وابعدي عنها أي مركبات صناعية بقدر الإمكان.. السهر محتاج حلول بسيطة للتخلص منه، مش كيماويات معقدة.
– غلطات الماضي اللي بتطل برؤوسها السودا فوق أنفك وخدودك اخلعي جدورها بحمام بخار وحطي ف المية أوراق نعناع ترجّع مسامك يتنفس من وسع.
– التهابات التجارب العنيفة لإزالة الشعر زي الفتلة أو الواكس صالحيها بماء ورد، عطره يفوّقك ويقفل مسامات جلدك فيمنع مرور أي دخيل من تاني.
اصنعي سحرك الخاص
اعرفي مفعول وتأثير كل مكوّن وألّفي سحرك الخاص.
– الليمون بيفتح لكن بيجفف الجلد؛ ممكن تخلطيه بلبن بودرة يقلل الجفاف.
– الزبادي مرطب ف الأساس بس بيفتح البقع السمرا، فلو بشرتك دهنية بس محتاجة تفتحي البقع ضيفي عليه مادة مجففة تعادل
ترطيبه، زي الطمي مثلًا.
– الدقيق منظف عميق المفعول، تقدري تعجنيه بمغلي النعناع لأنه منظف برضو.
– الترمس صنفرة رقيقة أوي للبشرة لكنه بيجفف إلى حد ما.. ممكن عجنه باللبن أو الزبادي، أو الرايب بردو كتير بنغفل عنه مع إنه مرطب هايل.
– عصير الطماطم بيصنفر الوش ويديله نضارة لكن لو بشرتك حساسة يبقى أول ما تغسليها طبطبي عليها بشوية حليب.
– البيض بيشد الوش ويمنع التجاعيد، لكن زيادته بتجفف البشرة، استعمليه بالعقل.
أهم حاجة.. ف الأساس مهما ادينا نصايح للإصلاح الخارجي كله ملوش أي لازمة لو مش مبني على أساس قوي.. الحاجات اللي بتساندك وتحميكي على المدى الطويل كلها داخلية مش خارجية.. اشتغلي على نفسك من جوة، هتبني جمالك الحقيقي، بعدها جمّلي الظاهر.. التغذية السليمة هي أساس كل جمال.
لو النهايات السعيدة مش موجودة، شغف السحر وصناعة الوصفات السحرية حقيقي وموجود، استغليها.. واسحري الدنيا حواليكي.
