بقلم/ وجدان جمال الدين
الآن وبعد أن نامت صغيرتي..
من وقت ما رزقني ربنا -سبحانه وتعالى- بهديته الغالية، مقدرش أستغنى عن الساعة دي، مهما حصل لازم أقعد يوميًا في آخر ركن في البيت، تحت اللمبة ومضلمة الشقة كلها وماسكة مج نسكافيه، متسألنيش إزاي لأني بشربه وأدخل أنام!
لازم أشحن طاقتي عشان أقدر أكمل باقي اليوم التالي.
سكون تام من غير زن من غير عياط من غير طلبات.
نفسي فقط.. بغمض عيني في سكون وصمت لعلي أخرج من الدوشة اللي جوايا.
بشد فيشة عقلي وفيشة وظيفة الأمومة اللي مفيهاش أجازات وكلها أوڤر تايم.
ومن هنا نخرج بشيء.. لازم كل أم حديثة العهد كانت أو قديمة إنها تخصص لنفسها وقت معين كل يوم، تقعدي فيه مع نفسك.. تمارسي هوايتك.. تستجمي.. تكوني إنتي فقط ولا شيء سواكي.
أيتها الأم والزوجة والمعلمة والمربية والطبيبة والسباكة والطباخة والممرضة.. من حقك تشعري بإنسانيتك. إنتي مش روبوت، إنتي إنسان يعيش ويتعايش، يحزن ويفرح. لازم تقدسي إحساسك ده، وممكن يكون قدامك أي طريقة، اقعدي ع البحر مثلاً.. اتمشي الصبح بدري وشمي هوا نضيف.. ارقصي زومبا.. اسمعي موسيقى.. ارسمي.. اكتبي.. اخرجي مع صديقتك.. روحي الچيم.. اطبخي أكلة بتحبيها ليكي.. اعملي شوبينج لنفسك.. روحي الكوافير.. ادخلي سينما لو متاح.. اشربي قهوة في كافيه بتحبيه ودلعي نفسك.
دي مش أنانية أبدًا ياعزيزتي، بالعكس، ده إنتي عشان تحبيهم لازم تكوني بتحبي نفسك أولاً وبتديها حقها.
إحنا الأمهات رأس مالنا صحتنا.. ولله الحمد ضايعة لوحدها.. حافظوا على روحكم متنطفيش عشانهم.
لازم يكون الموضوع ده بيقابل دعم من أسرتك، وخاصة الزوج، وعلى فكرة إنتي ممكن تفصلي بأقل الإمكانيات، إن شاء الله حتى تدخلي أوضتك وتغمضي عينك 10 دقايق بس!
دعم الأسرة عامل مهم وأساسي ليه؟
لأن ده يترتب عليه إنك تحسي إنك مسنودة، إن ليكي ضهر، وكمان بيكون فيه تقدير لتعبك ومجهودك وصحتك اللي بيتم استهلاكها بكل الحب والحنان منك.
وأخيرًا وليس آخر.. أحب أقولك إنك متستخسريش في نفسك أي حاجة، لا الوقت ولا الدلع. عيشي حياتك مبسوطة وبرضو راعي أسرتك واستمتعوا بوقتكم جدًا، وقدري كل لحظة بتعيشوها سوا، لأن بكرة هيكبروا وهتتمني تقضي معاهم يوم من أيام زمان، ومش لازم تفتكري أيام زمان بالتعب والإرهاق بس.
إنتي مش روبوت.. إنتي إنسان يعيش ويتعايش
