الجديد في المطبخ 2

430

استعرضنا في مقال سابق بعض المنتجات الجديدة على مطبخنا المصري واللي بقت متوفرة وبكثرة في السوبر ماركت، وكمان استعرضنا استخداماتها الممكنة والنهاردة هانكمل كلام عن مجموعة تانية من المنتجات دي.. 

 

Curry paste (معجون الكاري)

 

معجون الكاري هو حجر الأساس في أي طبخة هندية، وده بيختلف تماما عن بودرة الكاري المكونة من التوابل الرئيسية، ومعجون الكاري فيه منه نوعين أساسيين متوفرين في الأسواق، النوع الأول هو المعجون الأحمر 

وده بالإضافة للتوابل بيكون فيه بصل أحمر وطماطم وفلفل أحمر حراق، أما المعجون الأخضر، فده بيكون فيه بالإضافة للتوابل بصل أخضر وكسبرة خضراة وفلفل أخضر حراق.

 

والنوعين حراقين جدا فلازم ناخد بالنا قبل ما نشتريهم لو مش بنحب الأكل الحراق أو بيسبب لنا مشاكل صحية.

 

Pomegranate molasses (دبس الرمان) 

 

دبس الرمان هو عصير الرمان اللي بيتم تركيزه عن طريق الغلي لحد ما يبقى في اللون والقوام شبه العسل الإسود. والدبس طعمه حلو ومزز في الوقت نفسه وبيستخدم دايما في الأكلات والسلطات الشامية.

 

والدبس فيه منه أنواع كتيره مش دبس رمان بس، زي دبس الخروب ودبس التمر ودبس العنب. لكن الأشهر والأكتر استخداما هو دبس الرمان. 

 

Rice noodles  (نودلز الأرز)

 

دي النودلز اللي بيتم استخدامها في كل الأكلات اليابانية والتايلاندية ومعظم الأكلات الصينية، وتعتبر نوع من أنواع الباستا المصنوعة من دقيق الأرز. خفيفة على المعدة وسهلة وسريعة جدا في الإعداد. 

 

بس في ملحوظة مهمة لازم ناخد بالنا منها لو قررنا نطبخ النودلز رايس.. فهي على عكس كل أنواع الباستا مش بتتسلق في ميه سخنة لأنها ممكن تدوب وتختفي، وإنما بتتنقع في ميه عادية لحد ما بتطرى وبعد كده بيتم استخدامها.

 

 Tortilla bread (خبر التورتييلا)

 

ده الخبز الأساسي اللي بيستخدم في كل الأكلات المكسيكية.. متوفر دلوقتي في الأسواق في قسم المجمدات.

 

مصنوع بالأساس من دقيق الذرة ويشبه في طعمه العيش البتاو اللي بيتعمل عندنا في الريف، في منه أنواع بالطماطم ولونه أحمر، وبالحنطة ولونه بيميل للإسود، وبالصبار ولونه أخضر .

 

 Maple syrup (شراب القيقب)

 

عبارة عن النشا السكري لشجر القيقب المنتشر في شمال أمريكا وكندا. بيتم تبخيره واستخدامه في صناعة السكر والحلويات.

 

وشراب القيقب بيستخدم في تحلية البان كيك، وكإضافة لأنواع الأيس كريم والوافل والتحليات المختلفة. هو من أحدث المنتجات اللي بدأت تتوفر في الأسواق.

المقالة السابقةستيك مشوي بصلصة شواء منزلية
المقالة القادمةأنا وجولي وجوليا

ترك الرد

الرجاء إدخال تعليقك!
الرجاء إدخال اسمك هنا