بقلم/ وجدان جمال الدين
عارفين أهم حاجة في العلاقات إيه “الأمان”، إن يكون عندي ثقة عمياء لحد آخر نفس فيَّ. إني أحب لآخر حتة في قلبي فعلاً.. إن يكون عندي عطاء بلا حدود، من غير سقف، لما لا نهاية.
الأمان في العلاقات لو موجود، كل حاجة بتكون صح وبتكون موجودة. الأمان في العلاقات لما تتسأل إنت بتحب ده أو دي ليه بيكون مفيش سبب محدد، يعني مثلاً مينفعش أقول بحبه عشان كذا أو كذا، لا أنا بحبه وبس. بحبه عشان بحبه. بحبه للحب، للحياة، لكل حاجة موجودة ومش موجودة.. مفيش منطق.
كمان أهم حاجة في العلاقات واللي بتنبثق من مفهوم الأمان والثقة، إن الطرف التاني يعطيني الأمان، إنه يتحملني في كل حالاتي ولما لا نهاية، إنه ياخدني كده زي ما أنا واخداه زي ما هو “باكيدج”، بحبه في سعادته، مرضه، غضبه، جنونه، شوقه، طفولته، أنانيته.. بحبه على بعضه من غير تقسيم، من غير ما أجزَّأ شخصيته وآخد اللي يعجبني وأسيب اللي ميعجبنيش أو أكرهه. ده مش صح.. أو هيكون فيه فجوة أو حلقة ناقصة في العلاقة، هتبان بعدين وهتجني ثمارها.
الأمان أهم وأثمن شيء، ممكن نعيش عمرنا كله ندور عليه، ويا نلاقيه يا منلاقيهوش. العطاء والمحبة وأي حاجة تانية تترتب علي وجود الأمان.. الأمان إني متأكدة إن قلبه كله مليان بالحب زي قلبي بالضبط.. إنه ممكن فعلاً ياخد رصاصة مكاني. مش ممكن لأ.. ده أكيد!
الأمان إني لو سبت كل مجوهراتي مثلاً وبقيت مجردة من أي مغريات هيفضل يحبني، إني حتى لو كنت زي ما بيقولوا “عضم في قفة” شوية عضم، هيفضل يحبني حتى لو شعري تساقط وأسناني وقعت وجلدي كرمش.. مش هيسيبني.
الأمان.. إني أكون عارفة إن عمره ما هيخون توحدي معاه، عمره ما هينسلخ مني، وإن مهما كانت المسافة بينا فهو جنبي وقريب مني. هو أقرب قلب لقلبي.. هو أنا.
اوعي تتنازلي أبدًا عن الأمان في أي علاقة مع أي حد إنتي اديتيه مساحة في حياتك بإرادتك.. إنتي اللي اختارتيه.
لو بقيت مجردة من أي مغريات هيفضل يحبني!
