اقبل مشاعرك

472

بقلم/ وفاء مرزوق

 

زعلان.. متضايق.. مخنوق ومش عارف السبب.. غيران.. بتكره.. بتحب.. ناقم.. شاكر… كل سلسلة المشاعر الإنسانية اللي بنعدي بيها ومش بنبقى فاهمينها في بعض الأوقات أو مستنكرينها في أوقات تانية، أو بنهرب منها، أو بنغرقها وسط حاجات تانية عشان نغلوش عليها.

 

بس كل ردود الأفعال دي مش بتحل حاجة في مشاعرنا ولا بتخلينا نعرف نتعامل معاها إزاي. ولا هي بتختفي في الوقت نفسه بشكل تلقائي نتيجة اللي بنعمله، لكنها بتكون عاملة زي عفريت العلبة اللي بيطلعلنا في أوقات غير متوقعة. فيه حاجة بتعمل تحفيز trigger للمشاعر دي اللي في الغالب بيكون وراها فكرة أو موقف عدينا بيه وبنينا عليه معتقدات محورية في حياتنا.

 

المشاعر جزء أصيل من تكويننا، صعب نغفله أو نهمله. لكن مهم نسمعه، والأهم نعرف نتعامل معاه بشكل صحي وصحيح.

الأول متستنكرش على نفسك إنك حسيت الإحساس ده، حتى لو إحساس مش حلو، يعنى لو غِرت من حد أو لما سمعت خبر حلو عند حد فرحتله، لكن فيه حاجة لمست جواك في ألم عندك، فلقيت شعورين عكس بعض عاصرينك. سمعت بنجاح شخص وزي ما فرحت فكرت في حياتك هي فين من النجاح ده.

 

دوَّر على أصل الشعور والفكرة أو الموقف اللي وراه اللي دفنته ومتعاملتش معاه وقُلت هيختفي لوحده! هو مختفاش، هو بس اتدراى لوقت، وجه محفز راح مطلعه.

اتعامل مع أصل وجذر المشكلة، طلع ونضف الجرح حتى لو مؤلم شوية واقفل على نضافة. وجع ساعة ولا كل ساعة.

 

اسمع لمشاعرك لو اتكلمت من خلال جسمك. يعنى مشاعرك ممكن تطلع في شكل ألم جسدي تحس إنك مكسر ومش قادر تعمل حاجة، وكأن طاقتك كلها استُهلِكت فجأة. وكأن فيشة الطاقة بتاعتك حد فصلها.. كل ده وراه شعور حاول تتعرف عليه وتسمعه.

 

اقبل إننا مركبين ومعقدين وحياتنا أوقات بتكون زي شبكة عنكبوتية متشابكة ومتصلة ببعض. فك الشبكة دي مع كل موقف وشعور مُصاحب له.

 

اطلب السكينة والشجاعة والحكمة اللي تميز بيهم إيه من المواقف ينفع أغيره، وإيه محتاج أقبله زي ما هو كده، وميوقفش حياتي ولا يكون عفريت العلبة اللي بيطلع كل شوية.

 

مشاعرنا مش حاجة نهرب منها أو نستنكرها أو نُغرقها.. لكن نديرها.

 

سلسلة مشاعر بنعدي بيها ومش بنبقى فاهمينها أو مستنكرينها

 

المقالة السابقةلقد كان عامًا مليئًا بـ”لأول مرة”
المقالة القادمةلا تقبلوا بالقُبحِ مكافأةً على الصبرِ الجميل
مساحة حرة لمشاركات القراء

ترك الرد

الرجاء إدخال تعليقك!
الرجاء إدخال اسمك هنا