اطلبى المساعدة ولا تخجلى كلنا عارفين قصة الأرنب والسلحفاة اللى اتفقوا يعملوا سباق، الأرنب كان مغرور فنام شوية أثناء السباق بينما السلحفاة فضلت ماشية وعشان كده هى اللى فازت، وتوتة توتة خلصت الحدوتة.. لكن المفاجأة أن القصة لها تكملة! الأرنب تعلم من خطئه ولما عملوا السباق تانى هو اللى فاز. فالسلحفاة طلبت يكرروا السباق واختارت هى أرض السباق بحيث يقطعها جدول ماء، وطبعا هى اللى فازت لأن الأرنب مبيعرفش يعوم. وكان الفصل الأخير من القصة أن الأرنب شال السلحفاة فى الجزء اليابس، والسلحفاة شالت الأرنب فى الجزء المائى، ولم يكن سباقاً بل تكاملاً. اتربى معظمنا على أن طلب المساعدة ضعف، وفهمنا معنى الاعتماد على النفس أنه الاستغناء عن الناس. خلونا نعترف أن طلب المساعدة فعلاً فيه اعتراف ضمنى بالضعف، بس مش بضعف شخصيتنا لكن بضعفنا البشرى. و تعالوا نفكر فيها بالعقل: لو ربنا عاوزنا نستغنى عن بعض، طب ليه خلقنا كل واحد عنده نقط قوة ونقط ضعف؟ وعلى فكرة الاعتماد على النفس لا يتعارض مع طلب المساعدة لما أكون باطلبها فى الحاجة اللى مش عارفة أعملها بنفسى أو الحاجة اللى غيرى أشطر منى فيها، ولما أكون باطلبها من الشخص الصح. ولو تأملنا نفسنا والكون حولنا هنلاقى أن التكامل سنة كونية، فأجهزة الجسم متكاملة.. لو جهاز واحد اتشال بقية الأجهزة مش هيبقى لها لازمة! النملة لما بتلاقى أكل بتروح تنادى أصحابها عشان يساعدوها..الخ أنا مقدرة أن اللى مش متعود يطلب مساعدة ممكن يلاقى صعوبة فى الموضوع ده، وعشان كده أنا هاحاول أساعدك بشوية أسئلة تفكرى فيها عشان تفهمى نفسك أكتر وتفهمى المعتقدات اللى بتتحكم فى تصرفاتك: بتحسى بإيه لما تطلبى مساعدة؟ يعنى إيه اعتماد على النفس؟ احكى عن مواقف طلبتِ فيها مساعدة من الآخرين؟ إيه اللى جصل وحسيتِ بإيه نتيجة للى حصل؟ هل عانيتِ من إهمال والديكِ وبالتالى كان عليك الاعتماد على نفسك؟ بتخافى من الرفض؟ فكرى وشاركى صديقة بتثقى فى رأيها فى اللى هتتوصلى له، وابدأى دربى نفسك تطلبى المساعدة لما تحتاجيها.
