دليل للبنات: كيف تعرفين شخصية خطيبك؟ كيف أكلم خطيبي؟ عن ماذا أسأل خطيبي؟

11188

هو صحيح الجواز زي البطيخة، يا تطلع حمرا يا تطلع قرعة؟ بيتهيألي المقولة دي صح إلى حد ما، من ناحية إن فيه صفات وطباع مش بتكتشف إلا بالعشرة في بيت واحد بعد الجواز. وفي نفس الوقت تقدري في فترة الخطوبة تعملي اللي عليكي عشان تكتشفي أكبر قدر ممكن من شخصية خطيبك. والأسئلة اللي بتواجه كتير من البنات المخطوبات أو اللي في فترة تعارف: كيف أسأل خطيبي عن شخصيته؟ ماذا أسأل خطيبي؟ كيف أفتح موضوع مع خطيبي؟ كيف أعرف أن خطيبي محترم؟ في المقال ده هجتهد في الإجابة على الأسئلة دي. 

كيف أسأل خطيبي عن شخصيته؟ وكيف أعرف شخصية خطيبي؟

عشان تقدري توزني شخصية خطيبك، محتاجة يكون عندك معايير مستمدة من مصدر موثوق منه بالنسبة ليكي تساعدك في تحديد، إلى أي مدى أخلاق الشخص ده كويسة، ومعرفة الطباع اللي إنتي تستحملي أو متستحمليش التعايش معاها، والمواصفات اللي بتدوري عليها في شريك حياتك. تعالي بقي أديكي شوية أمثلة عملية:

– لاحظي مثلاً هل بيجيب في سيرة الناس؟ تعمّدي ذكر شخصية جدلية قدامه أو شخص إنتي عارفة إنه مش بيحبه أو زميل لكم في الشغل، وشوفي هيقول إيه. مفيش مشكلة إنه ميعجبهوش مواقف شخص ما أو آراؤه ويختلف معاه، لكن المهم الأسلوب، هل هيشتم ويعيب فيه؟ ولا هيسكت أو هيتكلم عن المواقف المختلف معاه فيها بأدب؟

بينقل كلام؟ بيحكي مثلاً الكلام اللي حد تاني قاله بالظبط كده من غير ما يفلتر ومن غير ما الكلام يكون له لازمة يحكيه، وبالتالي ممكن بالطريقة دي يوقع الناس في بعض من غير ما يكون بالضرورة متعمد؟

– مهم تشوفي مدى حرصه على الالتزام بفروض الدين من صلاة وصوم وأخلاقيات ومعاملات وغيرها.

لما بييجي يزوركم بيجيب معاه حاجة ولا بييجي إيده فاضية؟ مش شرط تبقى حاجة غالية لو مستواه المادي محدود، لكن بيحاول دايمًا يدخل عليكم بأي حاجة ولو بسيطة. ويمكن دي علامة مهمة عشان بنات كتير بتسأل: إزاي أكتشف بخل خطيبي؟

بيعمل إيه لما بيتنرفز (لما حد بيكسر عليه مثلاً أو الجارسون غلط في الـorder… إلخ)؟ بيشتم ويزعق ومبيشوفش قدامه؟ ولا بيتحكم في أعصابه؟

اقرئي أيضًا: العلاقات المتفجرة والعزل وكورونا: دليلك لعلاقات صحية

بيعتذر لما بيغلط ولا بيفضل يبرر غلطه؟

لما بتقوليله إنك زعلانة منه في حاجة، بياخد ويدي في الكلام ويسمعك ولا بيبقى كل همه يطلعك إنتي الغلطانة وهو صح؟

بيكذب؟

بيحترم الكبار: بيقول حضرتك ولا إنت؟ ممكن يقعد وحد كبير واقف؟ بيكلم الكبار وبيتكلم عنهم إزاي؟

الرحمة: بيعامل الأطفال إزاي؟

برّه بوالديه: بيكلمهم وبيعاملهم إزاي؟ لما حد منهم يقول كلمة مبتعجبهوش أو يتنرفز عليه بيسكت ولا بيرد؟ وبيرد إزاي؟ بيخدمهم وبيقضيلهم مشاويرهم وبيساعدهم لما يحتاجوله ولا ملهوش دعوة؟

النقط اللي فاتت دي وغيرها من أخلاق خطيبك وطباعه تقدري تكتشفيها بشكل أساسي من مواقفه وأفعاله، ومن الدردشة معاه وكلامه عن نفسه. 

وهنا يظهر السؤال اللي بيحير كتير من البنات: 

اقرئي أيضًا: 30 سؤال لشريك حياتك غير “إزيك؟”

ماذا أسأل خطيبي؟ كيف أفتح موضوع مع خطيبي؟

ساعات تبقي قاعدة مع خطيبك ساكتين، وتفضلي تفكري تتكلمي معاه في إيه، تلاقي عقلك “أبيض” ومفيش أي أفكار. ويمكن المشكلة بتكون موجودة أكتر في جواز الصالونات، لأنهم بيكونوا مش عارفين بعض ومش واخدين على بعض، ولسه مكتشفوش إن كان بينهم اهتمامات مشتركة ولا لأ. ولأن “المرء مخبوء تحت لسانه” فأنا هقترح عليكي شوية موضوعات وأسئلة تساعدك إنتي وخطيبك (أو الشخص المتقدم لك) تتعرفوا على بعض. اختاري منها اللي يعجبك وضيفي عليها من إبداعاتك:

  1. يومك كان عامل إزاي النهارده؟
  2. بتقضي يومك إزاي بعد الشغل (ويوم الأجازة)؟
  3. مين أكتر حد مقرب لك في عائلتك؟
  4. إيه أكتر صفات بتحبها في مامتك؟
  5. إيه الصفات اللي أنت واخدها من باباك/ مامتك؟
  6. إيه الصفات اللي بتدور عليها في الإنسانة اللي هترتبط بيها؟
  7. إيه المبادئ اللي تحب تربي ولادك عليها؟
  8. إيه أحلامك لمستقبلك العملي وحياتك الزوجية؟ 
  9. إيه الأكل اللي بتحبه/ مبتحبهوش؟
  10. احكيلي عن ذكريات الطفولة/ الجامعة.
  11. مين أعز أصدقائك (بيشتغلوا إيه؟ وبتخرجوا مع بعض فين؟ اتعرفت عليهم إزاي؟)؟
  12. إيه توقعاتك مني بعد الجواز؟ إيه الاحتياجات اللي منتظر أسددهالك؟
  13. إيه رأيك في شغلي بعد الجواز/ الخلفة؟
  14. بتخطط نجيب كام طفل وإمتى؟
  15. اتكلمي معاه في اهتماماته واسأليه فيها وفي تفاصيلها، واحكيله إنتي كمان عن اهتماماتك.
  16. اسأليه عن شغله، وعن طبيعته، وبيحبه ولا لأ، وليه.

اقرئي أيضًا: الحدود في العلاقات العاطفية وغيرها

نصائح هامة لعلاقة عاطفية صحية

وأخيرًا.. قبل ما أختم عاوزة أقولك كام ملحوظة مهمين:

كل الأسئلة المذكورة أعلاه دي هتتكلموا فيها على قعدات كتير، ويمكن موضوع واحد تفتحوه أكتر من مرة. أهم حاجة راعي إن الكلام يكون في اتجاهين عشان ميحسش إنك بتحققي معاه، وعشان هو كمان يعرفك، وبالتالي تشوفوا مدى توافقكم مع بعض. بالنسبة للشخص المتحفّظ، اصبري عليه واتكلمي معاه في الموضوعات اللي تهمه، عشان لما ياخد عليكي ويستريحلك يفتحلك قلبه ويتكلم أكتر فتقدري تفهميه.

لما يعمل أو يقول حاجة متعجبكيش أو تشوفيها غلط، أرجوكي تجنبي النصايح والمواعظ والنقد، خاصة في بداية العلاقة، عشان ميمثلش عليكي ويعمل ويقول اللي يريحك، وبالتالي متعرفيش شخصيته الحقيقية. ادّيله الأمان عشان يتكلم ويتصرف على طبيعته فتقدري تفهميه.

اقرئي أيضًا: 10 أشياء لا تقلها قبل شهر من الزفاف

“مش هتلاقي حد تفصيل”، جملة هتسمعيها من ناس كتير، وده حقيقي، لكن القايمة اللي بتعمليها بالصفات اللي بتبحثي عنها إنتي بتعمليها وإنتي عارفة إنك مش هتلاقي حد فيه كل الصفات دي، لكن فيه حاجات إنتي مش ممكن تتنازلي عنها، وفيه عيوب تانية ممكن تتغاضي عنها لو لقيتي باقي الصفات المهمة.

مفيش حد مبيغلطش، بس فيه حد بيرتكب غلط معين بشكل عابر أو بيحاول يصلح نفسه، وفيه حد مش شايف إنه بيعمل حاجة غلط أصلاً أو بيحاول يبرر لنفسه الغلط اللي هو بيعمله.

المقالة السابقةالكوفية الفلسطينية وتاريخها.. ما قصة ذلك الرمز العربي؟
المقالة القادمةاهربي لنفسك

ترك الرد

الرجاء إدخال تعليقك!
الرجاء إدخال اسمك هنا