لما بتأمل تطور الطفل بلاحظ إن فترات النمو بيسبقها أو بيصاحبها ألم بدني أو نفسي، زي الأريفة والتعب المصاحبين للتسنين أو البكاء والصراخ والضجر والمجهود اللي بيصاحب محاولة قيام الطفل بحركة جديدة زي القعاد أو رفع صدره من على الأرض….إلخ. الألم ده مش بيحصل بس على المستوى الفسيولوجي أو في نمو الأطفال، لكن كمان في حياتنا غالبًا الأوقات الصعبة هي اللي بتعلمنا أكبر وأهم دروس، وبتكون هي أكتر فترات بننمو فيها وبنزداد نضجًا، بس إحنا مش بنحس بده أو بندركه وإحنا في المعمعة، لكن لما بتعدي السنين وبنلاقي تصرفاتنا في مواقف معينة اتغيرت وشخصياتنا أصبحت أكثر نضجًا بندرك إزاي الأوقات الصعبة دي علمتنا وأنضجتنا.
في فترة سابقة من حياتي مريت بمرحلة غاية في الصعوبة والألم، الحياة بالنسبة لي مبقاش لها معنى، ثقتي بنفسي اتدمرت، مفاهيمي اتلخبطت. أعتقد إني كنت مكتئبة. لما فكرت في الحاجات اللي ساعدتني أقف على رجلي من تاني استنتجت شوية حاجات: وجود ناس حوالي بيحبوني وقابلني ومستحمليني رغم كل اللي عملته وكنت بعمله، سعيي إني أتعلم أكتر عن ديني وعن نفسي خلاني أشوف أخطائي وليه وقعت فيها، عمل الخير اللي من خلاله اكتشفت قدرات في نفسي مكنتش أعرفها، وبدأت أكون صداقات وأحس إني محبوبة ومتميزة ولي قيمة. وأول نقطة بالذات –السند والقبول- هي اللي لولاها مكنش النقطتين التانيين حصلوا. عشان كده:
– حاوطي نفسك بناس بيحبوكي وابعدي عن الناس السلبيين، ولما تمري بألم دوري على حد/ ناس تتسندي عليه/ عليهم لحد ما تقفي على رجليكي من تاني، ولما حد قريب منك يمر بألم اسنديه. ومش هتعرفي تسندي حد متألم وتحسي بيه غير لما تعرفي تقبلي ألمك وضعفك وتطلبي الدعم والمساندة من غيرك من غير ما تشوفي إن ده ضعف.
– لما تمري بألم خدي نفسك بالراحة، يعني متحاوليش تتعاملي وكأن مفيش حاجة حاصلة لكن حاولي تعملي اللي تحسي إنك قادرة عليه عشان متفضليش تحت سيطرة الألم.
– حاجات كتير مش بيداويها غير الزمن يمكن لتغير الظروف، أو الأشخاص أطراف المشكلة، أو يمكن لإن ساعات النفوس بتحتاج وقت على ما تهدى. اعملي اللي عليكي وسيبي الوقت يقوم بدوره.
– حاولي تفكري نفسك إن الألم ده شايل جواه الخير والنمو حتى لو إنتي مش شايفاه دلوقت لكن في يوم من الأيام هتشوفيه، ممكن كمان تفكري نفسك بإنك مريتي قبل كده بأوقات صعبة وعدت وبالدروس اللي اتعلمتيها منها.
– ولو جربتي كل اللي فات وفضلتي تعبانة، أو إذا لقيتي نفسك مش قادرة تعملي حاجة من الحاجات اللي فاتت فمتتكسفيش تدوري على المساندة عند حد مستشار نفسي متخصص. ربما تكون الأزمة الحالية سمعت في نقاط ضعف جواكي ومعتقدات خاطئة عندك لها جذور من الماضي.
سوا نقدر نعدي الأوقات الصعبة.
