بقلم: باسنت إبراهيم
أول ما شفت الصورة دي كنت بعملها Share من فترة للتانية، بس النهارده وأنا بدوس على share دارت ف دماغي أسئلة كتير أوي.. (لو عندك وقت اقرأ السطور الجاية عشان طويلة حبتين).
يمكن أولها: إيه اللي بيخلي الناس تشتغل أصلاً؟ بعيدًا عن السبب الرئيسي الخاص بأكل العيش.. ولإن الناس أسبابها بتختلف يعني.. فأنا هتكلم عن نفسي.. أنا كباسنت بشتغل من وأنا في الجامعة، لإني حبيت دراستي، مجالي، وحبيت شغلي بعدها بالتبعية.
يمكن على مدار أكتر من 6 سنين فاتوا، كان دايمًا شغلي في أي مكان بيبدأ برقم 3 في الصورة (فكرة مؤمنة بيها أوي)، وبعدين تحصل شوية أحداث تنقلني لرقم 2 مدير/ زملاء شغل كويسين جدًا، بحيث نشجع بعض ونحاول نحيي حتة الإيمان بالفكرة دي تاني.. المهم إني كنت بحاول دايمًا أبعد عن رقم 1.. شغل الإنسان الآلي 8 ساعات عشان أقبض آخر الشهر (نقطة)
مع احترامي لمحبي الـsystem ده واللي بيطبقوه بحرفية شديدة، اقتناعًا بإنه أحسن system بيطلع شغل من البني آدم المصري. وطبعًا ده بينطبق في حالات كتير، زي الوظايف الروتينية والحكومية والبتنجانية، بسميها وظايف الديسك أو المكتب.. مرتبطة في دماغي بالديسك اللي عليه أكوام من الورق والموظف مش باين وراها.. صورة مترّبة معفّرة بهتانة.. بس عمري ما حسيت إنه طريقة ناجحة! هو ببساطة طريقة بتحولك من إنسان مليان طاقة لإنسان بيفصص بسلة أو بيحل الكلمات المتقاطعة وهو بيشرب كوباية الشاي بلبن بالبقسماط ويقولك فوت علينا بكرة.
يمكن ده يبقى مقبول مع ناس طبيعتها كده، لكن السؤال التاني: ليه دايمًا معظم أماكن الشغل اللي بتعتمد على الـ creativityبيروحلها البني آدم من دول شعلة حماس زي رقم 3، وبيمشي أو بيتحول فيها لمكنة بتطلع قماش شبه السوق كله، زي رقم 1؟ ليه بجد؟
صحيح مفيش بني آدم طبيعي بيشتغل 24 ساعة في اليوم.. بس الإيمان بالفكرة ممكن يخلّي دماغك شغالة عليها، وبتشوف إزاي تنجحها في كل فترات يومك.. لا إراديًا عقلك بيوجهك لأي حاجة ممكن تطور الفكرة دي، جملة قريتها على عمود نور في الشارع، موقف حصل وإنت بتستجم ع البلاج في الأجازة، طعم فنجان قهوة مظبوط، دردشة مع أصحابك، شكل المنيو الجديد في مطعمك المفضل، كمية رغوة الصابون وإنت بتغسل إيدك.. لا إراديًا بتدي إشارة لعقلك إنه يطلّع أحسن حاجة من كل حاجة بتقابلها، تفيد فكرتك اللي إنت مؤمن بيها دي.
طيب، إيه اللي بيحصل برضو؟! عقلك بيهنج فجأة يعني؟ بتمّل؟ بتتعب؟ الطبيعي إن كل اللي فات يحصل لإننا بشر، بس من واقع تجارب كتير شخصية ولناس قريبة مني، ده عمره ما بيكون نقطة التحول من رقم 3 لـ1.
من رأيي.. إن السبب دايمًا بيبقى إن الشخص اكتشف فجأة إن الفكرة مش مؤمنة بيه زي ما هو مؤمن بيها. آه بتحصل لإن مش كل الأفكار بتكون شخصية.. من منطلق يا مربيّ في غير ولدك.. إنت فجأة بتكتشف إنك في مكان ما دورك المفروض يبقى رقم 1 في الصورة، بس مع شوية حماس وحبّ بتتحول تلقائيًا لوحدك لرقم 3! لوحدك، لوحدك لإن محدش بيطلب منك تعمل ده بشكل مباشر. والحقيقة اللطيفة دي لما بتكتشفها بتفضل تعاني شوية ف شوية ف شوية لحد ما تلاقي فكرة تانية تؤمن بيها وتشعل فتيل الحماسة فيك. وما بين الشويّات بتتحول لكائن تعيس، مُحبط من الروتين اللي بيقتل خلايا الـcreativity في عقلك.. م الآخر بتبقى عامل زي اللي لسّه خارج من قصة حبّ فاشلة، إمممم أو قصة حبّ من طرف واحد.
الخلاصة إيه بقي؟! لو كان فيه فكرة لازمًا تؤمن بيها وتشتغل عليها 24 ساعة.. خلّي الفكرة دي “نفسك”. اشتغل على تطويرنفسك 24 ساعة، واشتغل مع زمايلك ومديرك اللي بتحبه 10 ساعات.. واشتغل 8 ساعات علشان تلاقي معاك تمن المناديل والشيكولاتة اللي هتستهلكهم في فترة نقاهة حبّ الشغل من طرف واحد.
