بقلم/ شيرين شوقي مصري
الشتا بالنسبة لناس كتير بيبقى نهاية العالم، لكنه دايمًا بالنسبة ليّ الأمل.. بصيص آخر شعاع نور هيطلع من بعده شمس يوم جديد وهيبدأ حلم جديد.
مش بس عشان الفصل اللي اتولدت فيه، لأ، عشان بشوف فيه أسباب كتير تفرح ومش بس في الشتا، الفرحة بالنسبة ليّ أسلوب حياة بيبدأ من الشتا للخريف، عشان يرجع يكمل الدايرة اللي مبتنتهيش.. دايرة البهجة.
على سبيل المثال لا الحصر نذكر منها 16 سبب على حِس السنة الجديدة اللي بتنورنا في الشتا:
1- عشان فيه المطر. الوقفة في البلكونة وقت المطر دي بهجة مبنحسهاش في أي جو تاني، حتى لو واقفة تلمي الغسيل عشان ميتبلش، ده غير الرومانسية اللي بنشوفها كبنات في المشي تحت المطر وإحنا بنسمع مزيكا بنحبها، إحساس إن المطر هيغسل الدنيا وما فيها هيخليكي متطمنة إن كل حاجة هتبقى أحسن، وهتحسيه بيغسل روحك معاه، خصوصًا مع دعوة من القلب.
اقرئي أيضًا: أفكار لتزيين البلكونة بأقل التكاليف
2- المشروبات الساخنة. المركونة من وقت الصيف ما بدأ، دي اللي هتحرك الدم جواكي وهتحفزك تبدئي في كل الحاجات اللي أجلتيها عشان بردانة.
جربي كده فنجان قهوة أو كوباية سحلب ولا حتى مج كاكاو مع أي حد موجود معاكي واتبسطي بدفا المشروب والمشاركة.
3- البطاطين والأنتخة قدام فيلم في الويك إند، حتى لو عارفة إن وراكي شغل متلتل تاني يوم. شعور الدفا وروقان البال ده بالدنيا وما فيها، خصوصًا لو افتكرنا إن السقعة دي بتتعالج بسهولة عكس حر الصيف.
4- التفاؤل بإن كل حاجة بتنتهي عشان تجيب بعدها بداية جديدة، حلوة بقى أو وحشة كله هيتغير، حتى إحنا.
5- التطلع لآمال وأهداف العام الجديد قبل ما يبدأ، وتجهيز قائمة الإنجازات والأحلام لسنة جديدة على الأبواب.
6- كشف حساب السنة اللي بتخلص، وتصفية حساباتنا مع نفسنا ومراجعة سنة كاملة في أيام قليلة.. الكشف ده اللي بنشوف فيه أفراح وأوجاع مرّت كأنها كانت لحظات، مع إننا وقتها فكرناها مبتنتهيش.
7- حماس الأعياد اللي بتبدأ قبل السنة الجديدة ما تهلّ بيخلينا نشوف إن كل حاجة متأجلة هو ده وقتها، خروجاتنا مع أصحابنا والشوبينج مع أهلنا وزيارات القرايب كمان.
8- حفلات وأفراح الشتا بتكون مختلفة تمامًا عنها في الصيف، حتى لو حيرتنا في اللبس بس جواها بيكون دافي ومميز مع الناس اللي بنحبها، مش فرهدة وعرق.
9- البطاطا، الكيك، الفشار، البرتقال، اليوسفي، التسالي.. وغيرها حاجات بتحلي جو الشتا وبتخليه ممتع ولذيذ.
10- العزلة والخلوة بنفسنا حتى لو في تمشية بسيطة، مش بالضرورة تكون وحدة أو اكتئاب الشتا كما يُقال.. بس كوني لوحدك فترة بسيطة صفّي فيها روحك من كل الشوائب التي بتخالطها من الناس والشغل والحياة عشان ترجعي فريش من تاني.
11- الهدوم الشتوي بشكل عام والصوف منها بشكل خاص (البلوفر- الاسكارف – الجوانتي – البوت بأنواعه – البالطو – اللكلوك البيتي) مهما كانت غالية بس امتلاكنا لقطعة من أي نوع حتى لو كانت مش غالية بيبسط.
12- التريكو لمحبات الشغل اليدوي، بيكون ده الوقت المفضل ليهم لإنجاز حاجة حلوة بإيديهم يتم استهلاكها بدون تأجيل حتى لو مفرش صغير.
13- بُخار المياه في الجو البارد اللي كلنا وإحنا صغيرين مثّلنا إنه دخان سجاير.
14- قراية الكتب والروايات في الكام يوم الأجازة اللي بنخطفهم في عز البرد.. كتابك وتحت البطانية ومعاكي مج الهوت شوكلت وعيشي.
15- قريتي؟ ده وقت الكتابة بقى.. طلعي كل ذكرياتك الحلوة (وحدث في مثل هذا اليوم من الفيس هيساعدك) اكتبي جوابات لأهلك ولأصحابك ولنفسك كمان.. أهدافك وإنجازاتك ومخططاتك، سيبي القلم يستدرجك لحاجات عمرك ما فكرتي تطلعيها.
16- رجعت الشتوية.. وصوت فيروز.
