14 حاجة لو راجل هعملها

1135

 

“لو كنت راجل” دي مش مجرد جملة أخاذة وتشد بس ونسرح في عالمها الواسع، لكن دي حلم وأمنية مستمرة لبنات وستات كتير، وده طبعًا مش لأن الرجالة أحسن من الستات ولا حاجة، ولا حتى حياتهم أحسن، لأن كل واحد له دوره في الحياة، ولأن الست في أوقات كتير ومواقف مختلفة بيكون نفسها الرجل اللي معاها واللي اختارته يكملها وتكمل حياتها معاه يفهمها، وبتبقى عايزة تدخل جوة دماغه تشرحله أكترعن اللي هي حاساه وقتها، لعل وعسى يعني يفهم إحساسها وتفكيرها في لحظات كتير هو بيشوفها عادية، لكن هي بتكون حاجة تانية جوة دماغ الست، بتفضل تنمو وتترعرع جوة دماغها لحد ما تغير في مشاعرها، وممكن توصل لأنها تفقد شغفها في العلاقة كلها.

 

عشان كده أنا لو كنت راجل فيه حاجات كتير مش هعملها وحاجات تانية هعملها، عشان أكمل في علاقة سوية مش علاقة مكملة وبس، مع ست سعيدة، مش عايشة والسلام.

 

15 حاجة لو راجل هعملها

1- مش هقولها إنتي قاعدة طول اليوم بتعملي إيه، وهركز معاها يوم الإجازة، وهفهم لوحدي هي بتعمل إيه.

 

2- مش هسيبها تنام زعلانة ومعيطة بسببي مهما حصل، أو أكون عارف إنها زعلانة مني في حاجة، وأحاول أتوِّه عن الموضوع وأعمل مش واخد بالي، لكن هكلمها وأناقشها عشان زعلها مني ميكبرش جواها.

 

3- مش هبص على بنات وأنا معاها، ومش هبص أصلاً حتى لو لوحدي، لأن الطبيعي إني اخترتها وإنها مالية عيني، ولو مش كده يبقى أسيبها أحسن ومظلمهاش، لأن مفيش إحساس أصعب عليها من كده، وده بالنسبة لها خيانة، حتى لو صحابي شايفين غير كده.

 

4- مش هقابل صحابي كل يوم على القهوة وأسيبها لوحدها، كفاية يوم في الأسبوع، هي أكيد محتاجاني جنبها بعد يوم شاق.

 

5- مش همسك الموبايل وأنا قاعد معاها، لأن مفيش أهم من كلامي معاها، وأكيد هي محتاجة تتكلم معايا وأنا كمان زيها.

 

6- مش هقولها حاولي تخسي شوية، لأن أكيد دي حاجة مضايقاها هي كمان لو دي مش طبيعة جسمها، ولو دي طبيعته يبقى أنا حبيتها كده.

 

7- لما تكون متضايقة مش هقولها هسيبك تهدي، ومش هسيبها غير لما تهدا، يعني مين غيري المفروض يساعدها تبقى أحسن؟!

 

8- مش هقولها إنتي زنانة ونكدية، لأن دي مش طبيعة ناس عادية، لكن هفهم اللي وصلها لكده، وهنوصل لحلول مع بعض.

 

9- مش هكدب عليها، لأن غير إنها هتعرف وهيبقى شكلي وحش قوي، لكن الأهم إن عمرها ما هتثق فيَّ تاني حتى لو بينت غير كده.

 

10- هديها إجازة يوم في الأسبوع مني ومن الولاد ومن شغل البيت، رفقًا بجهازها العصبي، عشان تعرف تفصل وتشتغل تاني.

 

11- هتفرج معاها على مسلسلات تركي، عشان أفهم الحالة اللي هي مفتقداها ونفسها تعيشها وأملا الفراغ ده في الحقيقة مش في المسلسلات.

 

12- هجيبلها هدية كل شهر حتى لو بسيطة، عشان تعرف إنها في بالي وإني مهتم بيها.

 

13- هفضل أغير عليها زي أول ما عرفتها، ومش هحسسها إنها بقت كائن غير ملفت للنظر بالمرة، ولا حد واخد باله منها أصلاً، لكن هفضل أحسسها إنها البنت الصغيرة الشقية اللي أنا حبيتها.

 

14- هاخد رأيها في مشاكلي، لأنها أكتر حد هيخاف عليَّ.

 

لو كنت رجل هعرف إن البنت مفتاحها الحنية والاهتمام بأشكالهم المختلفة، واللي غالبًا بتكون بسيطة قوي، وهعرف كمان إن البنت اللي بتحب بجد وبتتسقي زرعتها كويس بتكون بـ100 صاحب، وإن ممكن حاجات صغيرة عند الرجالة تكون كوارث ومأساة عند البنات، فهحط نفسي مكانها وأحاول أفكر بدماغها شوية عشان أفهمها.

 

المقالة السابقةالتحول الجنسي من رجل إلى أنثى كيف رأته السينما المصرية
المقالة القادمةراجل ولا نص ولا تلات أرباع؟
مساحة حرة لمشاركات القراء

ترك الرد

الرجاء إدخال تعليقك!
الرجاء إدخال اسمك هنا