أنا إنجي.. هتجوز قريب.. أيوه أنا اللي دهنت شقتي المقال اللي فات.. والمرة دي ولأني لسه بجهز تجهيزات الزواج فأنا قررت أشارككم معايا في معركة شراء احتياجات العروسة.

أنا عندي ليكي خبر حلو أوي، إنتي مش لازم تجيبي خمسين ألف فوطة، وتسعين ملاية سرير، ومفرشين فيهم قلب في النص، وسبع بطانيات، وطقمين صيني، وحلل من كل الأنواع، آه والله، تخيلي؟

متسمعيش كلام حد، جيبي أعداد قليلة على أد الاستخدام، هتوفري في الفلوس وكمان الموضة بتتغير طول الوقت، ولما تجيبي أعداد مهولة هتستخسري تشتري غيرهم، والناس كلها هيبقى عندها حاجات موضة وإنتي عندك حاجات من العصر الحجري.

مفيش حاجة اسمها كمالة عدد، آه وربنا، يعني التسعتلاف فوطة المطرزين دول ملهومش لازمة، محدش هيدخل وراكي يعد إنتي جبتي كام فوطة، ولا حد له دعوة أصلاً على فكرة، طقم الصيني اللي هيتحط في النيش مش لازم سعره يعدي الـ3000 جنيه لأنك أصلاً مش هتستخدميه، أقولك على حاجة؟ النيش أصلاً في حد ذاته ملوش لازمة، آه والله.

زن الستات الكبار بتوع العيلة مش هيفيدك بحاجة، محدش هيتعك غيرك في الدولاب المكركب بالأربعة وعشرين ملاية سرير والأربع مفارش بتوع السرير، محدش هيطبطب عليكي لما تدي النيش كتف توقعيه كله والكام ألف جنيه اللي جواه يروحوا ع الأرض، أطقم الحلل الكتير مش هتستخدمي منهم غير 3 أو 4 حلل بالكتير والباقي هتورثيه لبناتك، وعلى فكرة بنتك مش هترضى تاخده وهتقولك لا أنا عايزة حاجات جديدة.

أنا بكلمك عن تجربتي الشخصية، أنا سمعت كلام كتير أوي لما قررت مجيبش أكتر من 5 ملايات سرير، واعتبروني كائن فضائي لما رفضت أجيب مفرش السرير أبو كرانيش وقلب في النص، وناس كتير كان هيجيلهم ذبحة صدرية لما جبت 6 فوط مفيهومش ولا فوطة قطيفة، وبالنسبة لطقم الصيني اللي مكملش 1000 جنيه اللي أنا كنت فخورة بنفسي أوي لما جبته، أكيد مش هيعجب ولا طنط من الطنطات اللي هييجوا يزوروني لما ربنا ينتعني بالسلامة من المعركة دي وأتجوز.

اسمعي كلامي.. متشتريش أطقم كريستال بوهيمي؛ هتستخسري تشربي فيهم، ومتشتريش أطباق غالية؛ مش هتاكلي فيهم، ولا تجيبي مفرش سرير شكله قبيح عشان تقولي للناس جبت مفرش بأكتر من ألفين جنيه.

صدقيني الفلوس اللي هتيجيبي بيها أعداد مهولة من كل حاجة ممكن تستخدميها في حاجات تانية أفضل، أنا استخسرت أجيب طقم صيني غالي بس روحت إيكيا واشتريت أحلى مكتبة هناك، مجبتش مفرش سرير غالي بس اخترت أكتر كنبة مريحة واشتريتها، اشتري الحاجات اللي إنتي عايزة تشتريها مش الحاجات اللي الناس بيزنوا عليكي عشانها.

محدش هيعيش في البيت ده غيرك إنتي وشخص، قررتوا تقضوا الباقي من عمركم مع بعض، واللي مش عاجبه بيتك يبقى ييجي زيارات خاطفة، أو ميجيش خالص براحته.

أنا لسه متجوزتش، بس أنا عارفة إني لما أتجوز مش هفتح دولابي ألاقي بطاطين بتقع عليّ عشان ملهاش مكان، ومش هخاف أتزحلق ع السيراميك أحسن أوقع النيش اللي جواه طقم صيني وطقم كاسات أغلى مني أنا شخصيًا، ومطبخي مش هيكون فيه حلل وصواني عمري ما استخدمتها والعنكبوت معشش فيها.

ده بيتك إنتي بقوانينك إنتي.. متخليش حد يلعب في دماغك.. فلوسك وبيتك وحياتك.. يبقى إيه دخل أي حد تاني بأي حاجة؟

خلينا نتبع قانون أبلة فاهيتا ونرفع شعار "ماهو أصل الناس.. ميستاهلوشي".